توالت الايام و دخل الصيف و عطاوها البنات للتبحار و الخروج، كوثر حاولات تشغل راسها باي حاجة باش ماتبقاش كتفكر ف علي بزاف بالرغم من انها فكل مرة تتفكر بلي غيتزوج كتحس بقلبها مقبوط و عينيها كيتحقنو بالدموع و لكن كتكابر باش ماتبين حتا حاجة لشي واحد اما ايناس حياتها استقرت نوعا ما و المشكل النفسي اللي كان عندها بدات تتشافى منو خاصة ملي تبعات عند الطبيبة الثانية واخا جاتها ماشي بحال ابتسام و لكن عل اقل كانت مرتاحة و هي كتشارك معاها كلشي و بكل صراحة، مرة مرة كانت كتجمعها الصدفة ب علي فدار عمتها و كيف جرات العادة لدقائق معدودة كانو عينيهم كيتحاورو و كل واحد فيهم كيمشي محمل بمشاعر الاعجاب و الايجابية بلاما ينطقو بحتا كلمة و على هاد الحالة بقاو حتا وصلات اخر سيمانة فالعطلة.......
فمساء يوم الجمعة، دخلات ايناس من عند ختها و مشات نيشان لبيتها لاحت فيه صاكها و بدلات حوايجها ببيجامة صيفية مريحة عاد خرجات فاتجاه الكوزينة، طلات براسها لقات مرت خوها واقفة عاطية بالظهر للباب و مسندة بايديها بجوج على لبوطاجي، قربات منها و حطات ايديها على كتافها قفزاتها، كريمة حطات ايديها على صدرها و غير شافت شكون تنهدات
-ايناس: سمحي ليا خلعتك ماقصدتش
-كريمة: لا ماشي مشكيل غير كنت ساهية
-ايناس: ختي مالكي؟ جيتيني ماشي هي هاديك؟
-كريمة هربات عينيها: لا انا بيخير غير توحشت خالتي
-ايناس بابتسامة: عيطي لها قولي لها تجي عندنا مرحبا بها و جلسو مع بعضياتكم ولا قولي لاسماعيل يديك لعندها
-كريمة: لا ماشي مشكيل، حتا ندير شي وقيت و نمشي عندها
-ايناس: شفتي الوقت الا ما درتيهش لراسك عمرو يدار بوحدو، من نهار تزوجتي ما شفتها جات لعندك بالسيف ما توحشيها ا صاحبتي
كريمة سكتات و هي ما لاقية ما تقول، تجيها نيشان و تقول لها مك منعات عليا نمشي عند خالتي او هي تجي عندي؟ تعاود لها على معاملة مها اللي تكفسات و رجعات خايبة معاها بزاف؟ فخاطرها اللي يعاود لايناس و اسماعيل كلشي و تقول لهم بلي مهم قدامهم زوينة و حنينة و موراهم معيشاها فالجحيم و لكن ماتقدرش، عارفة بلي الا مشات حتا هضرات عاد غتعيش فالعذا•ب كثر من هذا اللي عايشة فيه داكشي علاش تبسمات لايناس و نطقات و هي عاطياها بالظهر
-كريمة: فبالي نقول لاسماعيل يديني لعندها ان شاء الله
-ايناس: فين مالين الدار؟ شفت الصقيل
-كريمة: خالتي فبيتها و اسماعيل خارج مع ايوب
-ايناس: مزيان، انا غنشوف ماما و نجي لعندك
-كريمة: واخا ا ختي
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
