ليلتها دازت طويلة و ليلتو ماكانتش مختلفة عليها، كيتقلبو فسريرهم و النعاس مخاصم جفونهم و حالف مايخليهم يتهناو بيه، هو بين عينيه غير ضحكتها و هي بين عينيها نظراتو غير الفرق بيناتهم انو هو راضي و عاجبو شنو كيعيش و هي رافضة و كتحارب عقلها......
صبح عليهم الصباح و كل واحد فيهم تشغل بشنو عندو داك النهار، هو كيجري على التحضيرات د ليلة ختو و اللي على قبلها خذا كونجي د 15 يوم غير باش يوقف مع خوه و باه فالتوجاد و يدور مع عمر على باقي التجهيزات و هي استغلت ختها و بنت خالتها باش تشغل تفكيرها و عل اقل تتناساه فانتظار يوصل وقت زيارتها للطبيبة....
معاذ النهار كامل و هو كيحاول يجبد معاها المواضيع و يتناقش معاها باش تعرف عقليتو على الله ترتاح ليه، هي كانت كتجاوب معاه غير مجاملة منها و باش ماتقمعوش و صافي اما كون عرف تفكيرها و الحرب اللي نايضة فيه گاعما يعاود يدور بجهتها....
تعاشات العشية و رجع عندهم عمر باش يدير ما واعد بيه معاذ، جلس فالصالون اللي فالطابق الاول و تسناها تنزل هي و اسماعيل باش يجلسو معاها و يحاولو يقنعوها....
ايناس كانت شبه متأكدة من هاد الجلسة المغلقة و علاياش باغيين يهضرو فيها، دارت لهم خاطرهم و هي مقررة انها لآخر مرة غتهضر فداك الموضوع و تسدو خطرة وحدة.....
عمر و اسماعيل داروها وسط منهم و هما كيتغامزو بيناتهم و هي غير كدور فعويناتها و عايقة بيهم، ربعات ايديها و ارتاحت فجلستها فانتظار انهم ينويو و ينطقو خلاص
-اسماعيل حنحن: ايناس
-ايناس بملل: نعام
-اسماعيل: نتي كتعرفي معاذ مزيان مانحتاجش نشكرو لك يااك
-عمر: و عارفاه باغيك للحلال و ماكرهكش مراتو
-ايناس حطات ايديها على حنكها و تسندات على الطبلة: ممممم
-اسماعيل: شوفي هو عاود خطبك من عندنا و بغا يعرف جوابك ليوم
-عمر: و مغاديش يتفك معانا حتا نهضرو معاك نتي عارفاه فاش كيشد فالحاجة
-ايناس: و نتوما عارفين رأيي علاش محمقين ريوسكم بغيت غير نعرف
-اسماعيل: واخا نهضرو دابا بالمعقول، الا جيتي للصراحة انا بغيت نستغل هاد الجلسة باش نفهم واحد الحاجة
-ايناس تقادات فجلستها: شنو هي
-اسماعيل: هاد الرفض ديالك للزواج، مابغاش يدخل ليا لعقلي حيث مكاينش شي واحد كيكرهو، كيكون تخوف عاادي جدا ولكن باش تكرهيه و اي واحد جا ترديه من الباب بلا حتا ماتعرفيه ماقادرش نفهمها
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
