حل علي باب شقة من شقق ديك العمارة و جرها داخلين باش يبداو فعملية الاستكشاف و لكن قبل، رجعات هي جراتو من ايديه باش شادها و وقفاتو مقابل معاها و علامات التساؤل ظاهرين على ملامحها
-ايناس: شنو كانديرو هنا؟
-علي بابتسامة: جينا نشوفو دارنا
-ايناس: مافهمتش
-عنقها جنب و دور ايديه فالفراغ كيشير لها على انحاء الدار: هاد الدار فين غنعيشو ان شاء الله
-ايناس تفاجأت: وايلي!
-علي بنفس ابتسامتو: مابغيتيش؟
-ايناس: ماعرفتش، عرفت من ماما بلي عايش مع عائلتك و ظنيت بلي ملي غنمشي معاك غنعيشو معاهم
-علي: اممم بصراحة مامرتاحش نعيشو مع الواليدين و مع الاخ و مرتو، انا ماغنكونش على راحتي و حتا هما، فضلت ندير داري بوحدي كيفما كنت عايش فالرباط
-ايناس: علاش مابقيتيش فالرباط؟
-علي: شوفي غنجاوبك على گاع الاسئلة اللي فعقلك و لكن ماشي دابا، مازال غنجلس انا وياك و غنقول لك كلشي من الاول تال الاخير اوك! دابا خلينا نشوفو الدار
-ايناس: واخا.....
استكشفو الشقة اللي كانت مكونة من 3 البيوت و صالون و كوزينة و جوج حمامات واحد منهم فبيت النعاس، الحاجة اللي كتحمق ايناس فالديور هي لبالكونات و فديك الشقة كانو جوج، واحد فبيت النعاس و لاخر فالكوزينة و هاداك اللي فبيت النعاس كيطل على الواجهة الرئيسية د العمارات و قدام ديك الواجهة كاينة منطقة خضراء تسر العين، جاتها الدار مفروجة و حمقاتها لاقصى درجة و الاهم انها مشمشة و هادشي أكدو لها علي ملي سولاتو
-علي: مشمشة و مهوية، قبل ما نكريها جيت لها فالصباح و عاود جيت لها فوسط النهار، عجباتك؟
-ايناس: حمقاتني
-علي: كنت عارف
-ايناس ضحكات بخفة: و باش عرفتي؟
-رجع عنقها جنب و جرها خارج بها من البالكون د بيت النعاس: اوا مرتي، الا ماعرفتكش انا و ماعرفتش شنو كيعجبك شكون بغيتيه يعرف؟ على هادشي اصلا كريتها بلاما نفكر جوج مرات
-ايناس تبسمات: اممممم دابا فهمت....
خرجو لوسط الدار و وقفو كيدورو فعينيهم على الارجاء حتا عاود نطق هو
-علي: عندك شي اقتراحات على الفراش؟ باغا شي حاجة معينة؟
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
