ايناس علات راسها كتضحك على شكل عمر و هو كيقلد فاسماعيل و فشكلو كيف غيكون فالداخل، غير هي اللي طاحت عينها فعينو، ضحكتها طفات و عينيها تحقنو بالدموع بلاما يعطلوها، حسات بالرجفة تملكاتها كلها و تمنات تتشق الارض و تبلعها او تبلعو لمهم مايكونش هادشي اللي كتعيش فيه دابا واقع و حقيقة....
البلاطوات فايديها على شوية كانو غيطيحو للارض كون ماشي عمر اللي شدهم من ايديها و هو مخرج عينو فيها، عاد دابا كانت كتموت بالضحك شنو قلبها و خلا عينيها يدمعو
-عمر: ايناس مااالكي ياك لاباس
فين اللسان باش تجاوبو، عقلها كيتحارب باش يمحي اللقطات اللي كيزوروه، قلبها كيضارب باش مايزيدش يحقد و يكحال بسباب الشخص اللي قدامها.. اش هاد الزهر و اش هاد الدنيا، الا قالو صغيرة راها فعلا صغيرة باش من دون البنات د المغرب كامل ما يبغي خوها غير وحدة من جهة اخبث الناس اللي عرفات فحياتها...
ما فيقها غير عمر اللي نغزها حتا دارت شافت فيه ببلاهة
-عمر: شنو واااقع مالكي و زيدي تحركي را بقينا غير حنا اللور
حركات راسها بواخا و حدراتو تابعاه مكتشوف فحد، ماعرفات علامن سلمات او شنو كيتقال لها، فقط ريحتو المشمئزة اللي كانت مركزة معاها ديك الساعة و صوتو المدعدع اللي جاب لها التقية
-مرحبا بكم
ماكرهاتش تدفل ليه على كمارتو، ماكرهاتش تقت•لو و تشرب من د•مو...
فالمقابل هو ماكرهش كون نطق سميتها بصوت يسمعوه كلهم، ماكرهش يتلاح عليها يعنقها و يشبع من ريحتها، مامسوق لا لمرتو اللي كانت واقفة موراه لا لبنتو اللي كانت شادة فايديها.......
تجمعو كلهم فالصالون و كل واحد و شنو كيبان فوجهو، اللي الفرحة كتنقط ليه من عينو و اللي الشوق ذ•بح فؤادو و اللي الشمتة و التغوليفة شاداها ماباغا طلقها و اللي عينهم على هاد الثلاثي مافارقاتهمش، بلاما نهضرو على اللي كتسنى غير امتا تشوف هاد المنحوسة اللي سيطرات على عقل ولدها و خلاتو هايم فيها...
-خالة كريمة وقفات: مرحبا بكم، نهار كبير هذا...
خرجات خلاتهم و من بعد مدة قصيرة رجعات دخلات مع كريمة اللي كانت لابسة بيجامة طويلة كتبان جديدة غير من الوانها الزاهية و اللي مازال كيبريو، حادرة راسها للارض بخجل و الشال على راسها مرمي نصو مور ظهرها كيتمايل معاها.. سلمات عليهم كلهم حتا وقفات على ام عمر و ام اسماعيل، باست لهم ايدهم و كملات حتا وصلات لايناس اللي تبسمات لها بزز و هي حاسة باللي العينين مختارقينها و ماشي غير د شخص واحد....
-ام عمر: تبارك الله على كريمة، غزالة ما شاء الله
توردو خدود كريمة و تبسمات بخجل و هي حادرة راسها ماقادراش تهزو... ام ايناس مانطقاتش، شوفاتها مكانوش طبيعيين، كتسكاني السيدة ماشي غير كتشوفها...
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
