ديك العشية الدار ماخواتش من الناس، گاع اللي كيعرفهم و ساق الخبار بلي ايناس رجعات جا دار معاهم الصواب، حتا من خالتها و جداتها غير علماتهم مها فالتيليفون شدو طريقهم مع معاذ ديك الساعة في حين واليدين علي و خواتاتو غير تغذاو جاو حتا هما و معاهم حتا ريم اللي وصلها عمر بلاما يطلع، غير حطها تحرك من تما نيشان للدار و غير وصل طلع كيجري لعند مو بقا ليه غير البكا يبكيه
-عمر: والله حتا حشومة هادشي اللي وقع الواليدة، فالوقت اللي كان خاصني نكون واقف مع صحابي و نفرح لفرحهم حتا الوجه باش غنشوف فيهم ماكاينش
-ام عمر عينيها دمعو: صبر ا ولدي صبر، كلنا بحالك، تا حنا ماكرهناش نمشيو نفرحو معاهم
-عمر بغضب: ماتقوليش ليا صبر الواليدة، هي تزوجات و مشات عند راجلها و حرقتها مازال كطلع معايا، مشات و هاكاك مامهنيش (جلس و شد فراسو) مشيت حتا بغيت نطلع عندهم و نعنقهم و نقول لهم سمحو ليا على كلشي و لكن ماقدرتش
-حالتو بكاتها و خلاتها تجلس حداه تعنقو: كون درتيها، نتا مادرتي والو، ماكنتيش عارف شنو كادير ختك و ماعندهمش الحق يقلبو عليك وجهم ا ولدي، الخايبة هي كون كنتي مخبي عليها ولا كون واخا عرفتي شنو دارت بقيتي معاها مزيان و درتي عين ميكة
-عمر: انا اللي قلبت وجهي عليهم، انا اللي سمحت فيهم، مرگاتني الواليدة، وجهي تمرمد فالارض و عندهم الحق يقطعو كلامهم و يديرو اللي بغاو حيث كون كنت فبلاصتهم كنت غاندير بحالهم
مابقات لقات باش تجاوبو، من جهة متفهماه و بقا فيها و من جهة محروق قلبها حتا على بنتها اللي زوجوها و من داك النهار د الصدقة فاش مشات مع راجلها ماعاود سمعو عليها شي حاجة، التواصل بيناتهم تقطع بمرة و حتا لبنى اللي عائلتها من نفس العروبية ديال نسيبهم ماكانت عندها حتا شي خبار عليها و بالرغم من احساسها اللي مامهنيهاش من جهة بنتها الا انها ماقادراش تطلب من راجلها و ولادها يديوها لعندها تشوفها حيث من الاساس هما زوجوها باش يتهناو من شوفتها و من مشاكلها ماشي باش يعاودو يفتحو لها المجال تبقى تمشي و تجي عليهم عل اقل حتا يتناساو شنو دارت......
فنفس الوقت و فجهة خرى، خرجات ايناس من بيت الجلاس اللي خلات فيه مها مع ام علي و سارة و ابتسام مع هند و تبعات ريم اللي وقفات فالمراح كتراري ببنتها
-ايناس: مالها؟
-ريم بابتسامة: نعاسها حار، بغات تنعس
-ايناس مدات ليها ايديها: عطيها ليا شوية نريحك، ملي جيتي و نتي هازاها
-ريم: واخا...
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
