الدوش كان ليه تأثير سحري على علي و على نفسيتو، خرج منو و هو مبرد شوية، عل اقل فهم و استوعب انو مرتو ماعندها حتا دخل و اللي وقع ماشي بخاطرها او بغاتو لراسها، بلاما يلبس او يدير شي حاجة هز تيليفونو نيشان عيط ليها، غير سمع صوتها تنهد و غمض عينيه
-ايناس بنبرة صوت رقيقة مايلة للبكاء: علي انا مادرت والو، ماكنتش عارفة بلي شي وحدة كتصورني، كنت واخذة راحتي حيث كانو غير النسا بيناتنا و كنت فرحانة را عرس خويا مافكرتش گاع بلي ممكن تكون شي بنت الحرام
-قاطعها و هو كيماسي فجبهتو مغمض عينيه: ايناس انا عارف هادشي و ما عيطتش على وديتو، عيطت لك باش نقول لك الفيديو غيتمسح، غياخذ شوية د الوقت و لكن غيتمسح
-ايناس جلسات حابسة راسها ماتبكيش: واش مقلق مني؟
-علي: علاش غنتقلق منك؟ نتي اللي لحتيه ولا نتي اللي صورتي راسك؟ غنكون مريض الا رجعت لك اللومة و نتي اصلا ماعارفاش بلي شي ق.. (زم على فمو بلاما يكملها، تنهد و رجع كمل) ايناس انا مابغيتش نهضر معاك حيث كنت شاعل ديال بصح، داكشي اللي قريت و داكشي اللي سمعت كون هضرت معاك ديك الساعة غنقول شي حاجة خايبة و غنبدا نسب حتا ماغيبقاش بيناتنا الاحترام، بغيت غير الوقت حتا يتمسح هادشي اللي داير و نبرد و ديك الساعة نرجعو كيف كنا
-ايناس: و كيفاش غيتمسح؟
-علي: انا هضرت مع لي زادمين منهم اللي جاوب و منهم اللي لا، اللي جاوبوني راهم مسحو و اللي لا انا عارف شنو غندير و هضرت حتا مع شي ناس كنعرفهم غيديرو اللي عليهم باش يمحيو اللي قدو عليه، هادشي غياخذ الوقت و لكن غنحاول نسرعو، دابا اللي مهم ماتجاوبي حتا واحد و ماتجاوبي حتا نمرة ماكتعرفيهاش، تقدر تتواصل معاك الصحافة او الصفحات د المشاهير فسوشيال ميديا ماتجاوبيهمش تفاهمنا؟
-ايناس: دابا هادشي وصل حتا ليهم؟؟
-علي: كلشي ممكن، مهم انا وصيتك
-ايناس: واخا
-علي: نهضر معاك من بعد، يلاه تصبحي على خير
-ايناس: تصبح على خير...
حمدات الله حيث هند رجعات مع راجلها لدارها و كان بيتها خاوي قدرات تهضر فيه على خاطرها، رجعات عند البنات اللي تعلقو عينيهم عليها حتا دخلات لفراشها و تقادو فجلستهم كيتسناوها تهضر و هي ساكتة
-كوثر: وا قولي لينا شنو وقع؟ اش قال لك؟
-ايناس تكات بلاصتها: ما قال ليا والو، كيحاول مع الفيديو باش يتمسح
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
