رجوعا للوقت الحالي، ركبات حدا عمر اللي ديمارا محرك من دربهم كيقلب على بلاصة يوقفو فيها بعيد على الدار و بعيد على اي بلاصة ممكن يدوز منها اسماعيل و يشوفهم، غير وصل للمكان المناسب بالنسبة ليه، وقف الطوموبيل و سكتها داير لعندها... ايناس كانت حشمانة و مخلوعة و محرجة و هي حداه، ماعمرها توقعات تخسر علاقتها بيه لهاد الدرجة، الشخص الوحيد اللي ديما ضاحكة معاه هاد المرة كانت كتبكي حداه....
-عمر: مانشوفش دموعك ا ايناس، ماتحاوليش تبكي حدايا
مسحات دموعها و سكتات راسها بزز و قبل ما يعاود ينطق، صونا تيليفونها و حيدات ليه الصونيط
-عمر بحدة: هو؟
حركات راسها ب اه بلاما تنطق
-عمر: جاوبيه و ديري سبيكر
هزات فيه راسها و رجع كرر أمرو بقسوة خلاها ديك الساعة تجاوب
-ايناس: الو
-جواد: فين ا حبي، ماحشوماش عليك تخليني النهار كامل منشور نعيط لك و ماتجاوبينيش
ايناس شافت فعمر لقاتو عاض على لسانو قاسمو على جوج و كيشوف فيها شي شوفات لو كان كانو قرطاص غيحطوها جثة هامدة...
-ايناس بنبرة حاولات ما امكن تخليها قوية: ماكنتش مسالية
-جواد: او على ماكنتيش مسالية، ماعليناش، شنو درنا فداكشي
جبد عمر تيليفونو من الجيب و جبد المحادثة بينو و بينها و بدا يكتب لها شنو تقول ليه
-ايناس و هي كتقرا شنو مكتوب لها: داكشي اللي بغيتي هو اللي عمرو يكون، لو كان باقي عندك التصاور كون شحال هادي بنتي ماشي عاد دابا
-جواد تبدلات نبرتو: شوفي المشيشة نتي عارفاني مزيان الا قلت الحاجة كنديرها و مكنتفلاش
ايناس قرات شنو قال لها عمر و هزات فيه راسها و هو شير لها باش تنطق
-ايناس: مامتيقاكش، شنو يضمن ليا باللي غير كاديرها بيا و مكاين لا تصاور لا حتا زفتة؟ شوف انا خاصني نقطع خويا جا مانقدرش نزيد نهضر
قطعات عليه قبل ما تسمع جوابو، عمر ضرب لگيدون بايديه بطريقة عنيفة خلاتها تقفز و هي منزلة راسها ما عندهاش الوجه باش تشوف ليه فعينيه كيفما مولفة.. ما جات فين تهضر، كان وصلها ميساج فواتساب و كان منو هو
-عمر: دخلي
-ايناس طلعات ليها فنوتيفيكاصيون باللي مصيفط تصويرة و مابغاتش عمر يشوفها: تا نمشي للدار
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
