حكاية ظلام (مكتملة)

حكاية ظلام انت اختيار 21

لبسات ايناس و تقادات و ناضت من قدام ديك المراية اللي رجعات كطلب معاها الشرع، ميكاب نو ميكاب خذا منها الوقت كثر من كون دارت شي ميكاب ثقيل نيت عاد شعرها اللي صاوباتو ملات منو مطلوق شداتو جمعاتو ذيل حصان، هزات مگانة لبساتها فايدها الليسرية و تبعاتها بخاتم دارتو فسبابتها كيف مولفة عاد خرجات عند مها و ختها لقاتهم جالسين فالمراح لابسات جلاباتهم و واجدات كيتسناوها غير هي، غير شافت النظرات النارية د مها عرفات راسها كحلاتها و عطاتهم بالظهر نازلة و هي كتهضر
-ايناس: اش هاد التعطيلة عطلتونا والله الا حشومة خليتوني منشورة كنتسنى فيكم

-ام ايناس بصراخ: واخا يا بنيتي الا بقات فيك مانكونش مك

-هند: هههه والله حتا هبيلة

تحركو من قدام الدار و الطريق كاملة و هي كتسمع فنگير مها و دايرة راسها مامعاهاش، لاحت عينيها على ختها من المراية و باش تلهي مها مالقات غير ختها كطعم

-ايناس: هند واش راجلك غيجي؟

-ام ايناس: هاداك حتا هو بوحدو، مابقينا گاع كنشوفوه

-هند شافت فختها بمعنى "الا بقات فيك راني ماشي ختك": را غير مشغول بالخدمة ا ماما و زيدون را غيكون را غير انا طلبتو يحطني عندكم حتا نمشي معاكم

-ام ايناس: مازال ليا جلسة معاه نجبد ليه وذنيه

-هند: اش بغيتيه ا ماما خليه يدير ما بغا المهم ماحابسنيش نجي انا

-ام ايناس: لا غير يحبسك نيت باش نتفاهم معاه

-هند حتا هي بغات تبدل الموضوع: مرت ولدك مشات عند خالتها؟

-ام ايناس ماقدراتش تنفاعل قدام ايناس: اييه، توحشاتها مسكينة
-ايناس ببراءة: مسكينة لبارح بقات فيا، من نهار تزوجات ماشافتها و هي غير معاها فنفس المدينة كون غير كانت فبلاصة بعيدة نقولو ماعندهم كي يديرو يتلاقاو

ام ايناس عوجات فمها و قلبات عينيها و هي ساكتة و حتا هند ماعاودش نطقات، تبعو الطريق بعينيهم حتا وقفات ايناس قدام الدار د عمتها..

نزلات كتشوف راسها فالزاجة د طوموبيلتها ما حسات غير بايد تحطات على ظهرها كطبطب عليها بعنف
-ام ايناس: وا هادا لله معاك ا بنتي زيدي قداااامي زيدي

ضحكات ايناس بخفة و تحركات تابعة مها و ختها و قبل ما يدخلو كانت وقفات عليهم طوموبيلة اسماعيل اللي حل الزاج اللي فجهتو موجه لهم كلامو

-اسماعيل: واش نتوما عاد جيتو؟ عند بالي غنلقاكم سبقتوني

-هند: على شنو كتعرف على ختك؟ باش توجد راسها خاصنا نتسناوها عاماين