فصباح اليوم الموالي، يوم البطولة، علي ملي حل عينيه على النبوري و هو غادي جاي و كيتسنى الوقت اللي غيوصلو فيه الجماهير، واقف على الخيل ديالو و على تدريباتو اللي لحدود ديك اللحظة ماحبسهمش، و بجانب هادشي كولو بالو مشغول غير بها و عقلو كيفكر غير فموضوعهم اللي باغي يجبد مع خوها و ولد عمتها ليوم ملي يسالي كلشي، النهار اللي من امتا و هو كيتسناه غير يدوز باش يشوف حياتو وا اخيرا وصل، و اخيرا غيتفرغ لها و ليه........
فكازا، سليمة و ريم كانو موجدات راسهم و هما فبالهم بلي ايناس ماغتمشيش خاصة ملي عمر زاد اكد لهم بلي هضر مع اسماعيل بالليل و علمو بلي ماغيحضرش باش يعتاذر من علي نيابة عنه، فالوقت اللي سليمة دخلات لبيتها باش تهز صاكها كتتفاجأ بكوثر لابسة حوايجها و كتقاد فزيفها و هي فكامل اناقتها و زينتها بكحل عربي جبدات بيه عينيها و عكر وردي عطا مفعول طبيعي لشفايفها، طلعاتها سليمة بنظرات اعجاب و نطقات و هي كادور عليها
-سليمة: هاي هاي على الزين تاني، غتمشي معانا؟
-كوثر: اه، صباح فقت قلت مالي على حالتي شي يعيش حياتو شي يدفن راسو، ماعرفتي نتلاقى بشي ولد الناس اللي نعجبو و يبغيني بلاما نبقى محمقة راسي بشي واحد مامسوقش ليا اصلا
-سليمة: هاااا نتي وصلتي على هضرتي، والله حتا احسن حاجة غاديري هي هادي، خرجي فوجي يضرب فيك البرد و يشوفوك الناس
-كوثر: خسارة ايناس ماغتكونش معانا، الزغبية منحوسة
-سليمة: واييه، حنا اللي ماعندنا حتا علاقة و ربي يسر لنا و لقينا لي تيكي و هي اللي المفروض خاصها تحضر ليه عكس لها خوها، حتا هو بعض المرات كيهرب ليه الفريخ
-كوثر: نقولو الحمد لله على عمر، بصراحة واخا كيتعصب و يتنيرڤا ماكيكونش بحال اسماعيل
-سليمة: خلينا من هادشي و سربي راسك را الا تعطلنا غنشوفو العصبية د عمر ديال بصح
خشات كوثر فنيتة ثبتات بها شالها و دارت عند ختها بابتسامة
-كوثر: كي جيتك؟
-سليمة: فنة تبارك الله، شحال هادي ما شفتك مقادة و انيقة بحال هاكا، ليوم فاش درتيها جيتيني فشكل
-كوثر هزات صاكها و ضحكات بخفة: ماعرفت شنو جاني ليوم
-سليمة: فقتي على راسك و خرجتي من الغار اللي كنتي عايشة فيه، ماعرفتش علاش عندي احساس بلي ليوم غتلاقاي بحب قلبك
-كوثر: ههه زيدي زيدي راكي تحمستي.......
بادلاتها سليمة الضحكة و خرجو بجوجات فاتجاه باب الدار لقاو عمر و ريم عاد نزلو، ركبو جميع و تحركو فاتجاه مدينة الجديدة.....
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
