مور العشا، ايناس كانت واقفة مع ختها فالكوزينة كيغسلو فالماعن فاش تعشاو فجو صامت هرساتو ايناس و هي كتنطق موجهة كلامها لهند
-ايناس: واش مازال مقلقة مني؟
-هند ماشافتش جهتها: علاش غنتقلق منك؟
-ايناس: شوفي نتي
-هند: ايناس انا ما مقلقة ما مزمرة، خليني غير فهمي
-ايناس حبسات مسيح الماعن و هزات راسها فيها: هند مالكي؟ را كنشوفك غير مهمومة و كتفكري و لكن قلت مع راسي غير مقلقة مني و صافي
-هند: ما بيا والو غير خليني
-ايناس: لا بيك و غتعاودي ليا (شافتها كملات غسيل الماعن و جراتها) اجي معايا
-هند: ماعندي فين نجي معاك، نهضر معاك و غذا ولا بعدو تعصبي مني و تحطي كلشي فوجهي
-ايناس: واش نتي مريضة؟ عمري نخرج داكشي اللي كتعاودي ليا، هضرتي ديال داك النهار ما فيها حتا كلمة العيب، قلت لك ديها فحياتك و غتلقاي فاش تلاهاي واش هاد الجملة فيها شي حاجة ؟
-هند: نتي قصدتي مشاكلي مع راجلي
-ايناس: دابا واش كذبت عليك؟
-هند: ماكذبتيش و لكن ماتقوليهاش قدام ماما
-ايناس: واخا ا لالة كنعتاذر، مانعاودش نهضر قدامها
هند خنزرات فيها و تخطاتها داخلة لبيتها و تبعاتها ايناس مامفارقاهاش
-ايناس: والله ما غتفكي مني حتا نعرف مالك، حالتك ماكتعجبش
-هند تنهدات باستسلام و جلسات على طرف سريرها، من الاساس هي محتاجة تهضر و الا غتفرگع: انا مامرتاحاش
-ايناس جلسات حداها: علاش؟ زهير تاني؟
-هند قطبات حجبانها: و شكون من غيرو؟ تخيلي حتا ابيل ماكيخسرهاش عليا، فاش مرضات ماما عييت نصيفط ليه فلي ميساج و نعيط ليه و ماكيجاوبش، ديك الليلة فاش جات ماما من السبيطار تفرگعت عليه فميساج قدو قداش فالصباح لقيتو بلوكاني
شدات راسها بين ايديها كتبكي، خذاتها ايناس فحضنها عنقاتها كتمسح على ظهرها
-ايناس: دابا غير تهدني عافاك
-هند وسط دموعها: كيفاش غنتهدن و انا كنشوفو مبلوكيني بحال لاحني هنا و لقا راحتو، كنشوف سطورياتو فانستا اللي مبلوكيني منو حتا هو و ماعارفنيش داخلة عندو بكونط اخر، عايش الحياة بالطول و العرض ماكاين غير الخروج و المسارية و انا هنا مخشية بين الحيوط شكون مسوق ليا
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
