خرج علي من دار صاحبو و هو واخذ القرار اللي من زمان و هو كيدرس فيه، جا الوقت باش يستخدم ورقتو الرابحة حيث مابقاش فيه الحيل باش يزيد يصبر، الا كانت غير على البطولة سيمانة و غتفوت و الا هضر دابا بحال الا هضر من بعد...
طلع لطوموبيلتو و التيليفون فوذنيه كيتسنى ختو تجاوبو، بين عينيه غير الموقف اللي جمعهم و فوذنيه غير "مابيخيرش"، علاش ما بيخيرش و علاش دغيا تقلبات؟؟ جواب هاد الاسئلة غيكونو عند ابتسام اللي جاوباتو
-ابتسام: البطل ديالنا
-علي: ابتسام بيخير؟
-ابتسام: الحمد لله و نتا؟
-علي: صاڤا صاڤا، غتجي ليوم للدار عند الواليدة ؟
-ابتسام: انا عندها، لقيتيني عاد دخلت
-علي: صافي مزيان، تسنايني هاني جاي بغيت نهضر معاك
-ابتسام: على نتا فكازا؟
-علي: جيت هاد الصباح
-ابتسام: و فاش باغي تهضر معايا
-علي: انا شوية و نجي و تعرفي ديك الساعة
-ابتسام: واخا..
فالوقت اللي هو قطع مع ختو و قلع طاير لعندها كانت خرجات ايناس من الحمام فاتجاه بيت الجلاس قبل ما تتلاقى مع كوثر اللي خارجة من الكوزينة و وجهها كيقطر بالما، قبل ما تنطق شي وحدة فيهم وقفات عليهم سليمة اللي جرات ايناس من ايديها دخلاتها لبيتهم و جلساتها على سريرها و موراهم دخلات كوثر اللي سدات الباب و تكات عليه مربعة ايديها كتشوف فبنت خالها بنظرات متفحصة، غتاكلها...
-ايناس: اش هاد الجلسة المغلقة ههه ياك لاباس
-سليمة: نتي حالتك مابقاتش كتبشر بالخير
-ايناس: ههه و علاش ا ختي
-سليمة: غير ساهية و كتفكري و الوجه منور و مزنگ، كاينة شي حاجة ؟
-ايناس علات حاجبها: بحالاش؟
-سليمة: عرفتي شنو انا غنجيك من اللخر، بينك و بين علي شي حاجة ؟
-ايناس تطفات ضحكتها و خنزرات: اش غيكون بيني و بينو؟
-سليمة: را شفناك كيفاش طلعتي مزنگة و طلع موراك حتا هو مزنگ، اش وقع لتحت؟؟
-ايناس هربات عينيها: بنت لك غير طلعت مزنگة ما بنتش لك طلعت معصبة؟؟ كنت نازلة كنجري ما رديتش البال و دخلت فيه
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
