من بعد سلسلة الترحيب و الاسئلة عن الاحوال و حتا مباركهتم رجوع ايناس، وقفات ام عمر ناوية تنوض للكوزينة تعمر اتاي حتا حبسها اسماعيل بايديه
-اسماعيل: والله ما ديري شي حاجة ا عمتي
-اب عمر: غير كويس د اتاي عل اقل
-علي: بلاما تعذبو راسكم، جينا غير نساليو هاد الخصام اللي ما عندو فايدة
قال كلامو و هو حاط ايديه على كتف عمر اللي كان حادر راسو
-ام عمر: ماتصوروش فرحتنا فاش قالت لنا ريم بلي رجعات ايناس، تمنينا كون حضرنا معاها حتا حنا
-اسماعيل: حتا دابا مازال الحال
-ام عمر باحراج: فين الوجه باش غنشوفو فمك ا ولدي و شنو غنقولو لايناس ملي تشوفنا
-اسماعيل: الا كان غير على الواليدة ا عمتي ماتهزيش لها الهم، تبدلات و الوقت فين غتبقى حاقدة و كتفكر فالخوا الخاوي ولات عارفة بقيمتو و ناوية تعيشو غير فاللي كيريحها و كيفرحها اما ايناس (تقلبو ملامحو لملامح حزينة) ماعاقلة على حتا حاجة دازت
-عمر هز فيه راسو باستفهام: كيفاش زعما؟
-اسماعيل: هاد المدة اللي كانت غابرة كانت فالكلينيك، فديك الليلة دارت كسيدة و اربع اشهر و هي كومة و ملي فاقت كانت ناسية الفترة اللخرة من حياتها
عمر غير سمعو شد فراسو و غمض عينيه و هو مازال كيلوم فراسو في حين باه شاف فمرتو و حوقل بصوت مسموع
-اب عمر: لا حول ولا قوة الا بالله
-ام عمر: فقدات الذاكرة ؟ دابا نساتنا كاملين؟
-اسماعيل: نسات غير شنو عاشت فاللخر، فاقت على ديك الفترة فاش كنت غندير الخطبة و عمر كان كيوجد للعرس
-عمر تنهد و هز راسو كيدور فعينو بين صحابو بجوج: الله يوقف معاها و معاكم، بصراحة ماعرفت مانقول لكم والله، بغينا ولا كرهنا كنبقاو حنا السبب فهادشي اللي واقع
-علي: مزيان ملي جبدتي هاد الموضوع ماحد واليديك هنا نيت باش يتسد فخطرة، علاش نتوما السبب؟ (هز راسو فاب عمر) علاش ا الحاج نتوما السبب؟ علاش هاد الخصام اصلا و علاش تقطعات الصلة؟
-اب عمر: بالاحراج ا ولدي، كون عرفنا نربيو مانوصلوش لهادشي كامل
-علي: الا كان شي واحد خاصو يتحمل مسؤولية هادشي كلو اللي وقع را معروف شكون (عاود حط ايدو على كتف عمر) فهادشي كلو كيهمني صاحبي، ماكاين لاش نخصرو و يخصرني على ود شي حاجة جات بالمكتاب و حتا كون ماوقعاتش بسبب بنتكم كانت غتوقع بشي سبة خرى... انا عطيتك وقتك الكافي باش تفهم بلي ماعندك حتا علاقة و خليتك على راحتك ملي قطعتي الهضرة و قلبتي وجهك و والله كنت ناوي واخا مانلقاش ايناس كنت غنهضر مع اسماعيل و نجيو لعندك، هاد المحنة اللي دازت عليا انا بعدا علماتني نستغل كل وقت كندوزو مع الناس القراب ليا، ممكن فلحظة وحدة كلشي يتقلب و الواحد يخسر گاع داكشي اللي بين ايديه
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
