حكاية ظلام (مكتملة)

حكاية ظلام انت النور وسط عتمتي 52

تعاشات العشية و مور العصر كانت هند جالسة مع ولدها كتهضر ابيل فيديو مع نعمة كتعاود لها على شنو وقع

-هند: ملي خرج فالصباح ماعاودش دخل، واقيلا غير كنخوي الما فالرملة

-نعمة: دابا ركزتي فهاد البلان و نسيتي ملي حاول يقرب منك؟ ياك قلتي كتعياي تتقربي منو نتي و كيقمعك، هاد الحركة ماجاتكش تغيير؟

-هند: ماعرفتش، انا حاسة بلي ماكاين حتا تغيير

-نعمة: كاين التغيير ا هند و اول حاجة هي لبارح دخل بكري للدار واخا 12 راها ماشي بكري و لكن عل اقل بكري على الوقت اللي مولف يدخل فيه و زيدي داك التقرب اللي تقرب منك، غير كملي و انا متأكدة بلي غتلقاي نتيجة

-هند: ليوم غنشوف هادي اللي غتقابل ليا جاد، بغيت غير امتا نرجع ل لاصال و لي كوغ، صافي قدامي هدف متحمسة نوصل ليه والله

-نعمة: واش هادي اللي غتجي كبيرة صغيرة شنو كادير؟

-هند: ماعندي حتا فكرة عاد غنشوفها و نسولها

-نعمة: الا كانت شي برهوشة ماتدخليهاش لدارك را مابقات ثقة

-هند: انا واحلة غير مع اللي برا اما اللي فالدار ماديرهاش بيا حيث نعيق نعيق

-نعمة: و كي ديري تعيقي ا لالة؟

-هند: هو اصلا فداك الوقت اللي غتكون فيه هي ماكيكونش يعني ماغاديش يتلاقى بيها و زيدون را ساعتاين اللي غنغيب ماشي شي فترة طويلة و كيفما قلت هو ماغيكونش

-نعمة: مهم ردي بالك و صافي

-هند: كوني هانية ا ختي، دابا نكمل فهادشي اللي دايرة ياك! مانستسلمش

-نعمة: كملي كملي راك غادة و مازال تشوفي شنو غيوقع

-هند بابتسامة: صافي ان شاء الله عرفتي...

قبل ما تكمل كانت سمعات صوت الدقان فالباب
-هند: نعمة واقيلا هي اللي جات، انا نشوفها و نرجع نعيط لك صافي

-نعمة: اوك حتا تقولي ليا كيف دايرة

-هند: اوك باي باي...

خلات ولدها كيتفرج و مشات للباب حلاتو لقات قدامها شابة عشرينية زوينة و مقبولة لا فالشكل لا فاللبس، طلعاتها هند بنظراتها و كنظرة مبدئية بانت لها بريئة و كتدخل للخاطر في حين مروى كانت كتتحارب ماتبينش صدمتها من هند اللي كانت غزالة بالرغم من وزنها الزائد ماشي كيف كانت كتتخيلها من خلال كلام زهير عليها....