وقفات طوموبيل ايناس قدام دارهم بالوقفة د ديال اسماعيل حتا هو، نزلات متناسية فاش كانت كتفكر فاش بانت لها كريمة و خالتها نازلين حتا هما و قربات منهم بابتسامة و هي كترحب بام جواد اللي سلمات عليها و عنقات كريمة اللي بادلاتها التعنيقة
-ايناس: الدار خاوية بلا بيك ا ختي
-كريمة: الله يخليك ليا الزين
ايناس سلمات على خوها اللي كان هاز ايوب و طلعو للدار بالضبط للطابق التاني فين كانت ام ايناس مع هند جالسات كيديرو كسكروط و كيتعاودو على شنو وقع و هما كيضحكو قبل ما تختفي ضحكتهم و تتبدل سيفتهم ملي دخلات عليه ام جواد هي و ايناس و ايوب
-ايناس: السلام عليكم يا اهل الخييييير (قفزات على مها باستها) كي بقيتي دابا؟؟؟
ام ايناس تبدلو فيها الالوان و وقفات تسلم على ام جواد اللي قربات منها
-ام جواد: لالة سعيدة كي بقيتي؟ ملي قالت ليا بنتي كريمة شنو وقع لك حلفت مانخليها تجي الا و رجلي على رجليها، نساب حنا نساب ضروري نطمأن عليك و نوقف معاك فمرضك و نتهلى فيك
-ايناس: الله يعطيك الخير ا خالتي هذا هو المضمون فيك
-هند قلبات عينيها: كون ما عذبتيش راسك انا غندوز معاها هاد السيمانة و نتهلى فيها
-ايناس: واش بصح غاتدوزي معانا هاد السيمانة ؟ خلاك زهير؟
-هند: زهير ديبلاصمون 15 يوم، غنجلس عندكم سيمانة و غنمشي عند عگوزتي سيمانة
-ايناس: احسن حاجة، فين جاد؟
-هند: ناعس
-ام جواد: ويلي ماتنعسيهش ا بنتي فهاد الوقت المغرب هذا غادي يسهرك بالليل
هند فخاطرها اللي يقول لها و نتي مالك، عوجات فمها و سكتات
-ام ايناس لبنتها: فين خوك؟
قبل ما تجاوبها ايناس دخلات عليهم كريمة اللي سلمات على هند من فوق خاطرها و سلمات على عگوزتها بلاما تشوف فعينيها
-ايناس لكريمة: اسماعيل بقا لتحت؟
-كريمة: عيط ليه عمر و خليتو خرج لبرا، يمكن غيمشي لعندو
-ام ايناس بحزن: گاعما طلع يسلم عليا و يسول فيا
-ام جواد: شحال فيك حتا نتي ا ختي سعيدة، را غيرجع مالو غيبات برا
ام ايناس خنزرات فيها و سكتات، هي اللي باقا ناقصاها و لكن غير بلاتي هاد المجية ديالها غتخرجها من كريمة، كتحلف فيها غير بينها و بين راسها....
أنت تقرأ
حكاية ظلام (مكتملة)
Romansaالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
