نهار جديد باحداث جديدة، رجعات ايناس للدار و مورالها طالع، دخلات لبيتها حطات داكشي اللي شرات و بدلات حوايجها قبل ما تخرج فاتجاه الكوزينة، هزات راسها للمگانة لقاتها ل 10 د الصباح و مازال الحال علاما يجي علي للدار باش يتغذا معاها يعني عندها الوقت الكافي باش توجد لمفاجأتها.....
دارت غذاهم يطيب و مشات لبيتها هزات داكشي اللي شرات و خرجات لبيت الجلاس بدات كتقاد فداكشي اللي خاصها حتا سالات و ناضت حطات كل حاجة فبلاصتها و غير سالات رجعات دخلات للكوزينة تكمل توجاد الغذا، ما جا فين يوصل الظهر حتا كان كلشي موجود سواء المفاجأة و حتا الغذا، دخلات لبيتها خذات دوش خفيف حيدات بيه ريحة الطياب و توضات عاد خرجات لبسات كسوة بيضا قصيرة بلا كمام و لاحت عليها اسدال الصلاة و بدات صلاتها....
فدوك الاثناء، دخل علي للدار و نطق "السلام عليكم" و لكن ما لقا حتا جواب، لمح الطبلة اللي مقادة بعناية زايدة على غير المعتاد، ماحكرش ديك الساعة و دخل لبيت النعاس لقا ايناس كتصلي، حيد لاڤيست ديالو و جلس على طرف السرير متبعها بعينيه حتا سلمات و هزات راسها فيه و ابتسامة البهجة فالتة لها
-ايناس: على سلامتك
-بادلها الابتسامة : الله يسلمك
مد لها ايديه فالفراغ شدات فيه قبل ما توقف و يجرها حتا جلسات على ركابيه، طاوقات عنقو بايديها و نفس الابتسامة مازال فالتة لها خلاتو يحط ايد تحت ذقنها مدور وجهها لعندو و الايد لوخرى دايرة على خصرها و هو كينطق بتساؤل
-علي: غزيلي مفرحاها شي حاجة؟
حاولات تهرب عينيها و تقلب وجهها و لكن ماقدراتش بايديه اللي شادة فذقنها
-ايناس: بحال داكشي
-علي توسعات ابتسامتو: فرحيني معاك
-ايناس: نتغذاو و تعرف، خلينا نوضو را غيبرد
حاولات تنوض و لكن حكمها بايديه اللي دايرة على خصرها حتا تبثها عليه، حط راسو على كتفها و رجع عنقها بايديه بجوج و انفاسو كيضربو فعنقها و هو كيهضر بتعب
-علي: مانبقاش هاكا شوية د الوقت؟ محتاج لك
اختفت الابتسامة اللي كانت شاقة وجهها و فبلاصة الفرحة جا القلق و هي كتحط فايديها على وجهو كتتحسس لحيتو الخفيفة
-ايناس بقلق واضح فنبرة صوتها: بيك شي حاجة؟ عندك شي مشكل؟
-علي غمض عينيه كيستنشق ريحتها: غتكوني معايا و غيكون عندي مشكل؟ غير العيا ا حَبيبي، ماكرهتش شي تسافيرة نبدلو بها الروتين تاني
-ايناس: 15 يوم اللي بقات و يوصل الوقت د التسافيرة د البرد اللي كنا مبروكراميين، غير صبر دغيا غادوز (هزات راسو بايديها و قابلات عينيها بعينيه) عندي لك شي حاجة غتنسيك هاد العيا و غتنعشك من جديد
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
