ديك الطريق ما عرف كي دوزها و ديك السرعة اللي صاگ بها عمرو فحياتو ما وصل لها و هادشي كلو غير باش يوصل دغيا و يلحقها، دخل كيجري لقا خو حميد جالس متكي راسو و مغمض عينيه براحة خاصة من بعد ما عيط لمو و علماتو بلي كلشي تحت السيطرة، قرب منو عمر و دفعو من كتفو خلاه يحل عينيه و غير شافو وقف كيدور فعينيه
-اخ حميد: خويا جيتي
-عمر بقلة صبر: شنو واقع فين كوثر؟
-اخ حميد: احم دخلوها للعملية
-عمر: نتا اللي عيطتي ليا؟
قبل ما يجاوبو اخ حميد خرجات عندهم الممرضة و قصدات اخ حميد اللي شافتو المرة اللولة معاها
-الممرضة: محتاجين للدم ضروري خاص اللي يتبرع لها، المخزون اللي كان عندنا سالا
-عمر: انا خوها عندي نفس الفصيلة ديالها، نقدر نتبرع لها
-الممرضة: واخا ا سيدي تبعني..
خذات منو المعلومات اللي يخليوها تتأكد بلي صالح انو يتبرع و فدوك الاثناء كان اخ حميد سمح فالسبيطار و شد الطريق للدار و هو شبه مرتاح انها ماغتنوضش منها خاصة من بعد ما سول نفس ديك الممرضة و علماتو بلي حالتها مامستقراش حاليا......
جلس عمر كيتسنى شي خبار تريحو، فدوك الساعات تفكر فيهم كلشي و حقد عليها و رجع حن فيها و تخلطو عليه المشاعر حتا ما بقا عارف واش هما سبابها حتا وصلات للسبيطارات ولا هادشي مكتاب، مازال ما قادرش يتوقع شنو وقع لها و كيفاش حتا وصلات لهاد المواصل و لكن ماطاحش ليه فالبال نهائيا تكون عائلة راجلها السبب خاصة و انو ماشافش الكدمات اللي فوجهها و فلحمها، فكر فكلشي الا فانو هما اللي غيكونو دارو لها شي حاجة، ما حاولش يعيط لشي واحد يعلمو بشنو واقع حيث ببساطة بغا حتا يتأكد من شنو كاين و يعرف واش يعلمهم غير فالتيليفون او غيخصو يمشي لعندهم برجليه باش يعرف كيفاش يوصل لهم الخبار و فگاع الحالات خبر بحال هذا ماشي ديال التيليفون....
من بعد ساعات بان ليه طبيب خارج و معاه نفس الممرضة اللي كانت خرجات قبل، قفز لعندهم و وقفهم كيسول و الخوف باين من عينيه
-الطبيب: حالتها كانت صعيبة و لكن لحسن الحظ جابوها فالوقت، الموس اللي تطعنات بيه كان خاصو يبقى و لكن تحيد و هادشي خلاها تنزف بزاف و كون ماشي المتبرع اللي حتا هو كان فالوقت المناسب كنا غنخسروها لا قدر الله
تنهد براحة ملي تأكد عل اقل بلي هي عايشة قبل ما دير ليه طرن فالراس ملي رجع السينتة و عاود الهضرة د الطبيب فعقلو، كيفاش موس و كيفاش تطعنات؟ عقد حجبانو و قبل ما يسول كان جاوبو الطبيب بحال عارف شنو كايدور ليه فراسو
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
