فصباح يوم السبت، دخلات كوثر للكوزينة لقات مها و مرت خوها واقفين على الغذا كيوجدو فيه، وقفات فنص الطريق كتفكر واش تهضر قدام لبنى ولا تصبر حتا تمشي بحالها فاللخر قربات من مها و تحنات على وذنها كتهضر بخفوت
-كوثر: بغيت نهضر معاك
-ام عمر: مامسالياش دابا حتا نسالي و هضري
-كوثر: ماما مانقدرش نصبر بغيت نهضر معاك
-لبنى شافت فيها بطرف عينها: ماراضياش تهضري قدامي ا ختي كوثر؟
ماشافتش فيها و دارت راسها ماسمعاتهاش
-كوثر: ماما كيفاش حتا خطبني هذا، منين عرفوني؟
-ام عمر مسحات ايديها فجلايلها و هزات فيها راسها: بلال اللي جابو
-كوثر: مافهمتش، منين غيعرفو بلال و هو فقرطة حنا؟
تدخلات لبنى فالكلام و جاوبات فبلاصة عگوزتها
-لبنى: مي ا ختي كوثر كتعرف دوك الخطابات و وصاها بلال الا كان شي ولد الناس تقصدو و تقولها ليه
هزات فيها كوثر عينيها لقاتها كتشوف فيها بنظرات عرفاتهم مزيان و تلقائيا فهمات البلان شنو فيه، قبل ما تعاود تنطق شي وحدة كان تسمع صوت التيليفون د ام عمر كيصوني، خلاتهم بجوجات و خرجات هي لبيتها تجاوب عليه و فدوك الاثناء قفزات كوثر على مرت خوها شاداها من ذراعها
-كوثر: بلعاني ا بنت الحراااام بلعاني درتيها ياااك، عارفاه كبير عليا و بعيد بعد السما على الارض فداكشي اللي كنتمنى داكشي علاش جبتيه ياااك
تبسمات لبنى باستهزاء و ماجاوباتهاش حتا عاود زيرات عليها كوثر الشدة اللي شادة فيها
-كوثر: غتفكيني منو ا لبنى نتي اللي جبتيه نتي اللي غتفكيني منو
-شافت فيها لبنى بنظرات خبيثة: نهار جاك ولد الناس معقول داخل سوق راسو و عايش مستور رفضتيه ا حگا ماشي مستوايا و ساكن فالعروبية اوا شوفي المستوى دابا كيف داير (نفضات ذراعها منها و ضرباتها لكتفها) نهار جيت قلت لك خويا كيبغيك و مستعد يحطك فعينيه و باغيك للزواج رفضتيه و عفستي على قلبو بلاما تحني، حتا دابا شوفي شنو ديري
-كوثر بانفعال: ماعندكش الحق تستغلي هادشي اللي واقع ليا باش تنتاقمي، خوك كيبغيني انا ماكنبغيهش
-قاطعاتها لبنى: عاد فهمنا علاش ماكتبغيهش (عوجات سيفتها) حيث الاخت كتبغي راجل بنت خالها، كتبغي راجل مزوج
-كوثر: هاداك را بغيتو قبل ما يتزوج و حتا واحد ما باغي يفهم بلي هي اللي خذاتو مني
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
