حكاية ظلام (مكتملة)

حكاية ظلام انت اختيار 23

نزلات كريمة كتجر فرجليها و ولدها قدامها كينقز حتا وصل على اسماعيل اللي كان يلاه غيدخل لبيتو قبل ما يبان ليه، هزو باسو و سول فيه و طلقو مشا دخل لبيتو و هو هز راسو فمرتو اللي كانت كتقرب ليه حتا وقفات مقابلة معاه و بدون سابق انذار تلاحت عليه معنقاه و هي متحكمة فدموعها بزز باش ماينزلوش و لكن ماقدراتش، لقات راسها كتشهق فحضنو خلعاتو

-اسماعيل: كريمة مالكي؟؟؟؟؟ مالكي ا حبيبة اش واقع علاش هاد البكا؟؟؟

بعدها عليه بلطف كيشوف فوجهها الحمر و دموعها اللي كانو سيول، شبك ايديه مع ايديها و دخلو لبيتهم سادين عليهم و عاد لقا راحتو يعنقها و يمسح على ظهرها كيهدن فيها

-اسماعيل: دابا مالكي؟ غير قولي ليا شنو كاين هاد البكا ديالك كيقهرني

-كريمة كتشهق: ما..شي لخا..طري، ما..قادرا...ش نحب...س

-اسماعيل زاد زير عليها معنقها: واخا انا معاك حتا تهدني، مغانخرجو من هاد البيت حتا تولي بيخير و ترجع لك الضحكة اللي من شحال هادي ماشفتها
حركات راسها بالايجاب فوسط حضنو و بقات على حالتها كتبكي و كتشهق و هو صابر عليها حتا تفش على خاطرها......

فالفوق، خرجات ام ايناس من بيتها عاقدة غوباشتها و نيشان للكوزينة كانت ظانة بلي فيها غير مرت ولدها حتا لقات ايناس قدامها و زادت تعصبات كثر ما هي معصبة
-ام ايناس: اش كاديري هنا

-ايناس: خاصني نزغرت الحب حيث و اخيرا خرجتي من بيتك، دوك القصص دياولك غادي يخليوك بلا عقل

-ام ايناس بعصبية: فين مرت خوك؟

-ايناس: نزلات عند راجلها

ام ايناس غير سمعاتها رجع الشرار كيخرج لها من عينيها و هي شبه متأكدة بلي غتكون نزلات كتجري لعندو باش تسبقها و تقول ليه شنو كادير فيها....

شدات فالباب د لكوزينة مالت عليه و قلبات عينيها بحال باغا تسخف و بدات تنطق بهمس متقطع
-ام ايناس: عتق..يني... بغي...ت لما و سك...ر

ايناس كانت عاطياها بالظهر خدامة ماسمعاتهاش حتا جاتها زدحة قوية فالباب خلاتها تقفز و قلبها غيخرج من بلاصتو و هي كتشوف مها فاشلة قدامها و طايحة للارض، ما حسات براسها حتا جرات لعندها و هي كتغوت باعلى صوتها على اسماعيل باش يطلع يعتقها، خذات راس مها بين ايديها و عطاتها وذنيها تسمع باش كتمتم غير عرفاتها بغات لما و سكر خلاتها و ناضت كتجري تجيبو لها بالطلعة د اسماعيل و كريمة اللي غير شافوها تحناو عليها مخلوعين

-اسماعيل خذا راسها بين ايديه: لواليدة مالكي؟ ماتخلعينيش عليك مالكي؟؟؟