حكاية ظلام (مكتملة)

حكاية ظلام انت اختيار 22

دازو ايام على ديك العراضة كان فيهم البال مشغول بالمجهول، قلب رافض شنو سمع و عقل متقبل بزز بلي كلشي كان وهم.....

تشغلات ايناس بالخدمة و رجع وقتها عامر من جديد و تشغل علي بالبطولة حتا مابقاش كينزل لكازا نهائيا بلاما تخرج هي من تفكيرو، متحمس يسالي دغيا باش يشوف حياتو و يرتاح بالو في حين هي جمعات رجليها من دار عمتها و مابقاتش كتمشي مخافة تجي شي صدفة تجمعهم تاني و ترجع تستسلم لاحاسيسها و هي عاد كتولف تتناساهم و تقمعهم خصوصا و ان عندها ذكريات بزاف معاه تما، حتا من الطبيبة الثانية اللي كانت متبعة معاها سمحات فحصصها معاها و مابقات باغا دير حتا شي حاجة، حاسة براسها فاشلة و داك الدافع اللي كان عندها و معاونها باش تكون عندها الرغبة فالعلاج تبخر.......

اما كريمة من بعد ديك البياتة، معاملة ام ايناس معاها عاد ما زادت تكفسات كثر من الاول و صبرها بدا يتقاضى، رجعات خاصاها غير دفيعة و تفرگع.....

فصباح يوم جديد، خرجات كريمة من بيتها لاوية عليها بينوار الشوميز ديالها و توجهات لبيت ولدها دخلات ليه كتفيق فيه غير تأكدات بلي فاق رجعات لبيتها تحنات على وجه راجلها طبعات قبلة على حنكو و فيقاتو حتا هو قبل ما تبدل شنو لابسة ببيجامة طويلة و طلعات للطابق التاني توجد ليهم الفطور لقات ايناس عاد خارجة من بيتها لابسة حوايجها و هازة طابليتها

-كريمة: صباح الخير نونوسة

-ايناس قربات منها و حطات ايديها على فمها كتهضر بشوية: شششش تسمعك ماما دير لنا الروينة هنا مكتحملش اللي يعيط ليا هاكا

كريمة حمدات الله اللي ماسمعاتهاش، هادشي اللي مازال ناقصها
-كريمة: عطيني 10 دقائق غنوجد لك فطورك مع خوك و ايوب، سمحي ليا داتني عيني حتا مشا الحال

-ايناس: واش نتي من نيتك كتطلبي السماحة مالكي خدامة عندنا، انا ماباغاش الفطور مكنقدرش ناكل فالصباح بكري ديري الفطور غير لولدك و راجلك انا اصلا تعطلت

-كريمة: وا اجي غير دي معاك شي حاجة بعدا

-ايناس: ماتشغليش بالك، غنسلك راسي، يلاه انا مشيت

سلمات عليها و خرجات من الدار فاتجاه طوموبيلتها في حين كريمة دخلات للكوزينة كتزرب باش توجد الفطور قبل ما تخرج عگوزتها من بيتها، ما جات فين دير لما يطيب و تبدا حتا كانت دخلات عليها بسيفتها المعتادة فكل مرة تشوفها

-ام ايناس بحدة: تبارك الله على لالة مولاتي، اش هاد التعطال؟

-كريمة: سمحي ليا ا خالتي والله ما حسيت بالوقت غفلاتني عيني