فجهة خرى و بالضبط فكازا، خرجات سليمة من بيتها على صوت مها لي كانت كتهضر فالتيليفون و كان باين عليها الغضب، عقدات حجبانها و هي واقفة مقابلة معاها كتقرا ملامحها و كتحاول تفهم علاياش معصبة ساعة ما قشعات والو، ربعات ايديها و تسناتها حتا قطعات على لي كانت كتهضر معاه عاد نطقات مسولاها باهتمام
-سليمة: مالكي ا ماما ياك لاباس؟ معامن كنتي كتهضري
-ام عمر بنرفزة: مع خالتك عيشة، لبارح كانت الخطبة د بنتها
-سليمة هزات حاجبها: شكون حياة؟
-ام عمر: امينة ا لالة، شوفي لك نتي الحاجة لي كانت عندي نمشي نجري نعاودها لها و نحضرها فكل مناسبة واخا تكون غ صغيرة و هي دارت لخطبة لبنتها و الحالة حالة و ماقدرات حتا تقول ليا مرحبا واخا غير بالضحك و ملي سولتها علاش قالت لك ا حگا بنتها خافت من العين حتا من عائلة الراجل ماحضرو حتا واحد من غير مو و خواتاتو
-سليمة: و شكون هاد الراجل؟ كنعرفوه؟
-ام عمر: ماكنعرفوهش و لكن كيجي ل علي راجل ايناس
-سليمة بلعات ريقها بشك: سميتو كريم؟
-ام عمر: مانعرف لمهم قالت بلي ولد خالتو، تخيلي حتا من خالتو ام علي ماعرضوش عليها، ماقالوها لحتا واحد تقولي غنطيروه لها ولا غنديرو لها شي حاجة الله يستر
-سليمة بدات ترمش بسرعة بالاعصاب لي شدوها: ماما غير بشوية قولي ليا كيفاش را مافهمتش هاد الراجل غير جا و طاح على السيدة
-ام عمر: حتا انا مافهمتش، ماعطيتهاش الفرصة فين تعاود ليا اصلا عصباتني و مرضاتني، كنشوف راسي الصغيرة و الكبيرة كنوصلها لهم و هما وااالو كلشي كيخبيوه و لكن مزيااان والله حتا مزيااان هادي دير ليا العقل
سمحات فيها سليمة و دخلات لبيتها خلاتها كتهضر بوحدها بحال الحمقة زادت عصباتها كثر ما هي معصبة، ماكانتش عارفة بلي الشك واكل بنتها و الا مشا حتا داكشي لي كيدور لها فراسها بصح يعني ختها دارتها بها....
هزات تيليفونها و اول وحدة عيطات لها هي امينة، المرة اللولة الثانية الثالثة ماجاوباتهاش حتا صيفطات لها ميساج عاد جاوباتها و التردد باين من نبرة صوتها
-سليمة بغضب: كتمشيو غير بالتهديد، خفتي نشوه مك عاد جاوبتي يااك، واخا ماشي مشكل، شنو واااقع؟؟ عاودي ليا شنو كاين ولا قسما بالله خر** مايجمعوه شراوط
-امينة: سليمة انا ديك الطريق عطيتها بالتيساع من زمان ختك لي مابغاتش تبدل و مابغاتش توب
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
