حكاية ظلام (مكتملة)

حكاية ظلام انت اختيار 39

سالات الليلة بفرحتها و بحلاوتها و غير خوات الدار من المعروضين، وقفات هند على زهير اللي كان كيسلم على نسيبتو باش يمشي بلاما يحاول يقول لها يلاه حيث عارفها ماغتبغيش حتا صدماتو

-هند: تسناني، انا نلبس جلابتي و نمشي معاك

-ام ايناس: تعطل الحال ا بنتي بزااف، خليكم تال الصباح و سيرو

-زهير: انا غير خليني نمشي ا خالتي، الا بغات هي تزيد تبقى، تبقى حتا لغذا و تجي

-هند: لا لا غنمشي معاك دابا، ماشي مشكيل ا ماما فالوقت اصلا غنمشيو فطوموبيلتنا

-ام ايناس: اللي بغيتو..

-زهير: انا غنهز جاد و نزل للطوموبيل حتا تجي

-هند: واخا

فالوقت اللي دخلو للبيت باش يهز هو الولد و تبدل هي قفطانها، وقفات كريمة هي و راجلها على مو

-اسماعيل: الواليدة محتاجانا فشي حاجة ؟

-ام ايناس: لا ا ولدي غير سيرو ترتاحو

-كريمة: تصبحي على خير

-ام ايناس: تصبحي على خير

تبعاتهم بعينيها حتا نزلو و تبعهم زهير عاد دخلات للصالون فين كانت مازالة جالسة ايناس مع خالاتها و بناتهم
-ام ايناس: نوضي باراكة عليك و نتي عينيك كيتسدو بالنعاس، نوضي ترتاحي

-سكينة: بلاااااتي ا خالتي حتا نعرفو شنو وقع بعداااا

-ام معاذ: الله يمسخك ا بنتي، صبري حتا تزوجي حتا نتي و تعرفي ديك الساعة

-ايناس لمها: شكون خلاني ا ماما نوض

-ام معاذ: غير نوضي ا بنتي تال غذا و يحن الله، را كيبان بلي فيك النعاس

-ايناس: والله الا باغا غير نسد عيني

-ام ايناس: اوا هي دابا، نوضي

دارت ما قالت لها مها و خرجات تلاقات بهند خارجة من بيتها، ودعاتها و دخلات لبيتها بدلات قفطانها و خرجات للحمام غسلات وجهها و دارت روتينها الليلي قبل ما تبوس مها و تعاود تدخل لبيتها سدات عليها و تخشات فبلاصتها و التيليفون فايديها كتسنى لابيل ديالو، غمضات عينيها كتتفكر اجواء هاد الليلة كيف دازت ما حسات براسها حتا غرقات فنعاسها خلاتو كيصوني غير ما جاوباتوش عرفها نعسات و تخشى فبلاصتو حتا هو مستسلم للنوم فراحة قلب ماكتوصفش.......