دوز زهير ديك الجليسة مع علي و اسماعيل و هو حاضر جسدا و غايب عقلا، تفكيرو غير فردة فعلها ملي غيعتارف لها بكلشي، عارف و متأكد بلي كتحماق عليه و كتبغيه كثر ما كتبغي راسها اكيد الا بين لها بلي ندمان و بلي غير الشيطان لي زيغو حتا دار فعلة بحال هاديك و دخلها عليها للدار غتسمح ليه خاصة الا خاطب عاطفتها و امومتها و جاد لي غيتشتت و غيضيع بيناتهم الا تفارقو، من الاساس مادايرش احتمال الفراق فبالو حيث عارفها ماغتقدرش عليه، عارفها ماتقدرش تعيش بلا بيه و واخا تبدل حتا تشبع قلبها عمرو يتبدل من ناحيتو و غتسامحو سواء تقلقات او تجاوزات ديك الساعة نيت......
تسناها حتا لبسات كسوتها و دارت زيفها عاد هز ولدو و نزل لطوموبيلتو مخليها كتسلم على عائلتها، حالتو كانت حالة و هو ماقادر حتا يهز فيها عينو ملي ركبات اللور و خذات منو جاد، ردات لبال لسهوو و صمتو لي طال و نطقات مسولاه باهتمام
-هند: كلشي بيخير؟
-خرجاتو من بحر افكارو لي غرق فيهم مرة اخرى: كلشي بيخير، مالك نتي؟
-هند: مالي؟
-زهير: كنتي كتبكي
-هند: امتا؟
-زهير: ملي عاد جيت خرجتي من بيتك عينيك و وجهك منفوخين، كيبان بلي كنتي كتبكي
-هند تنهدات: كنت كنهضر مع نعمة على الامتحانات، حسيت براسي كنخوي لما فالرملة و گاع داكشي لي حافظاه تنسى ليا بحال عقلي خاوي ماحسيت براسي حتا بديت نبكي بالخلعة
-زهير نطق بمزاح و ثغرو مزين بابتسامة جانبية: مزوج عيشة الدماعة (سكت شوية قبل ما يهز عينو فيها من المراية) هند اش بان لك نخرجو نتعشاو هاد الليلة فشي بلاصة؟ بغيت نجلس معاك برا الدار عندي ما نقول لك
لتواني بقات مفيكسية عينيها فوجهو هو لي قلب عينو للطريق كيتسناها تجاوب
-هند بلباقة: تقلق مني الا قلت لك نخليوها لمور الامتحانات ؟ غنجلس معاك بعقل مرفوع غير سمح ليا
-زهير: هند خاصني نجلس معاك ضروري مانقدرش نأجل الموضوع
-هند: نهضرو فالدار نيت، الوقت لي غنضيعوه فالخروج نستاغلو انا فالحفاظة، كنظن الموضوع ماغاياخذش وقت كبير ماشي بحال الا جلسنا و تسنينا العشا و تعشينا عاد نهضرو، سيلتوپلي زهير خلينا غير فالدار
-زهير: واخا ماشي مشكل المهم نهضرو
ضيقات شوفتها فيه و عقلها كيفكر فشنو باغي يهضر معاها، توقعات كلشي الا موضوع الخيانة حيث من الاساس ماتتخيلوش يتجرأ و يديرها، يكون باغي يهضر على قرايتها و مدرستها؟ او على الطوموبيل لي غيشري لها؟ يكون زعما غيعطيها طوموبيلتو على ما ياخذ لها ديالها؟ الا كان هذا الموضوع ماغاديش تقبل حيث هي باغا ملكها، باغا شي حاجة بسميتها ماشي بسميتو هو.......
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
