داز العشا و سليمة ماعاودش لقات الفرصة فين تعاود تهضر مع ايناس و هي كتشوف خواتات راجلها دايرين بها ماطلقوهاش ملي رجعات دخلات، نسبيا كانت مرتاحة حيث عل اقل وصاتها ترد البال واخا فقرارة نفسها كانت عارفة بلي نهار تسيق الخبار بلي كانت عارفة شنو دارت فيها ختها غتخسرها ديال بصح...
فديك الليلة استغل علي الفرصة و جلس مع اسماعيل باش يتافق هو و ياه على تفاصيل العرس اللي متوقعين انو غيكون فالعطلة د الربيع على اعتبار انو اب علي عندو اصدقاء عندهم معارف ممكن يوقفو معاهم باش يخرج الانتقال فمدة قصيرة، علي كان باغي يتعاون معاه هو و ايناس و يتكلف بالنص د المصاريف عاد مصاريفها هي اللي غتحتاج بحال النگافة و اللي غتصاوب لها الا انو اسماعيل رفض تماما شي تكليف من عندو، من زمان و هو كيجمع لداك النهار اللي غيفرح فيه بختو، فلوس عرسها كانو محطوطين و واجدين ماغياخذ لا من عندو لا من عندها و ملي سولو علي علاش؟ جاوبو اسماعيل انو لو الاب ديالهم كان مازال عايش كان غيفرح بها بهاد الطريقة و ماغيخلي حتا واحد يتكلف بفرحها من غيرو من غير انو ايناس بالنسبة ليه بنتو ماشي ختو، بكلامو خلا علي يتبسم و يعرف قيمتها و بلاصتها عند خوها كيفما خلاه يعرف بلي كاين فظهرها راجل مفروض عليه يدير بحسابو..........
من بعد ما مشاو الضياف و بقاو غير مالين الدار، ايناس كانت مازال بجلابتها و بقات جالسة مع ام علي و كنزة اللي وقفات موجهة كلامها لخالتها
-كنزة: خالتي انا غنزل نغسل الماعن مع شريفة
-ام علي: غير جلسي ارتاحي را النص د الماعن حيداتهم ملي كنا كنتعشاو، تلقايها قربات تسالي
-كنزة: اه عرفت و لكن حشومة كلشي يبقى عليها
-قوسات ام علي شفايفها باستغراب و حركات لها راسها بالايجاب: اللي بغيتي ا بنتي، غير ديري نقابك الله يرضي عليك مافينا جهد لشي صداع من راجلك تاني
-كنزة: فبالي ا خالتي ماتخافيش (شافت فايناس) نتعاونو بجوج؟
ايناس تحرجات قدام عگوزتها و فالوقت اللي نوات تهضر، سبقاتها ام علي
-ام علي: بنتي دخلي غير لبيتك ترتاحي اما شريفة راها قادة على شغالها بلاما تحتاجي تعاونيها لا نتي لا تجري معاك البنت، دغيا بغيتي تزيديها للشغال من الليلة اللولة عندها لها هنا
-كنزة بضحكة صفرا: لا ماشي هاكاك غير باش تولف علينا و صافي
قبل ما تعاود تنطق فيهم شي وحدة تسمعات تحنحينة رجالية خلات كنزة تهز نقابها بسرعة و دارتو على وجهها تحت انظار ايناس اللي غير كترمش حتا نطقات ام علي بصوت مرتفع
-ام علي: غير دخل ا ولدي
دخل علي بابتسامتو المعتادة، باس على راس مو و جلس حدا مرتو اللي متبعاه بعينيها مبادلاه الابتسامة، موراه دخل باه و زكرياء، ايناس غير شافتهم وقفات احتراما لهم، خذات ايد باه باستها و هي كتجاوبو على سؤالو على الاحوال و اكتفت انها تنطق "السلام عليكم" و هي كتشوف فزكرياء اللي كان خطف فيها الشوفة غير المرة الاولى قبل ما يجاوبها على سلامها و جلس حدا مو بعيد على مرتو..
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
