فصباح اليوم الموالي، وقفات طوموبيل علي قدام الدار د ام ايناس و هو كلو حماس على عكس كتلة الجليد لي كانت جالسة حداه، قلبها مزير من والو و اصرارهم على انها تجرب شنو قال الشيخ مخليها على قد ما رجعات باغا على قد ما راها خايفة...
دار لعندها بجسدو و هو عارف بلي عندها شي حاجة مخبياها عليه غير من ملامح وجهها لي ماكيتفسروش
-علي: من البارح و انا كنسول فيك مالك و مابغيتيش تقولي ليا، اش واقع؟
-ايناس باستسلام: من البارح و انا كنتحارب مع راسي و مابقاش عندي الجهد
-علي: مالكي؟
-ايناس: خايفة والله حتا خايفة نتأمل و نتصدم، مابغيتش نحلم و نفيق مفزوعة
-علي: ماتزيديش فيه ا ايناس، المفروض تكوني باغا تجربي لي تقال لك، اي حاجة سمعتيها تقدر تفيدك ديريها
-ايناس: هادشي اللي ماقادراش عليه، باش اي حاجة نتيقها و فاللخر مايكون والو را صدمة خرى
-علي: بالعكس ا ايناس بالعكس، ياك كتقولي تقبلتي حالتك اذن مافيها والو الا جربتي سوا كانت النتيجة ايجابية او سلبية، نتي ما غتخسري والو راها تجربة بسيطة و ماغتدي منك والو و ماتنسايش راها مذكورة فالسنة يعني لا مجال للغلط
-ايناس: و هو عندك الحق ماقلتش العكس، دابا الا درتها و مارجعش ليا؟
-علي: عادي، كيفما جاك الابتلاء من عند الله غنصبرو عليه حتا يمشي، تخيلي تجربيها و يرجع لك؟
غير مجرد التخيل نوّر وجهو هو لي نطق بيه و وجهها هي لي تخيلات بلي غترجع تشوفو و تشوف حبابها و ترجع لحياتها الطبيعية بلاما تكون محتاجة لشي حد و بلاما تحس لقات عينيها عامرين دموع
-ايناس: ماكرهتش
-علي بنبرة دافية: اذن جربي ا حبيبتي ماغتخسري والو
-ايناس: غنجرب و لكن ماشي ليوم، حتا تمشي مني زميرة كيف كتسميها نتا
-علي: زعما فيها مشكل؟ كون سولنا الشيخ البارح، نتي سكتي و انا نسيت
-ايناس: من الافضل نديرها و انا نقية، غنخلي ماما تتوضا و تعطيني داك الما فبوديزة و نديها معايا نهار الاربعاء ان شاء الله غنتوضا و غنغسل بيه
-علي قوس شفايفو: ماعرفت انا كنقول كون تجربي دابا ماغتخسري والو واخا ماتكونيش نقية
-ايناس: علي بلاما تبزز عليا، غنجرب الوقت لي مكتاب، ماغتنزلش؟
-علي: غنوصلك نسلم على ماماك و غانمشي نقضي شي حاجة قبل ما نشدو الطريق ان شاء الله
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
