من بعد ما داز داك الفطور فجو مكهرب بين زكرياء و باه لي ماعجبوش الحال حيث جرا على مرتو، هز علي مرتو و داها لدار مها لي كانت عارضة عليهم للغذا، خلاها معاها و مع مرت خوها و خرج هو مع اسماعيل و عمر فاتجاه الكافي لي كانو مولفين كيجلسو فيه قبل ما يدير كل واحد فيهم دارو.......
دخلات كريمة لبيت الجلاس و فايديها صينية د اتاي و الضحكة شاقة وجهها بحال ختها لي جات تزورهم من بعد الزواج
-كريمة: مرحبا بلالة ايناس الزين و الثباتة
-ايناس بابتسامة: الله يحفظك ليا ا ختي كريمة
-ام ايناس تبسمات لعروستها: ملي فاقت ا بنتي و هي تدخل من بيت و تخرج من بيت كنسولها مالك كتقول ليا ماعرفت علاش حاسة براسي فرحانة حيث ايناس غتجي
-ايناس بغرور مصطنع: هاديك غير المعزة اصلا انا عارفة راسي عزيزة و كنخلي بلاصتي داكشي علاش
ضحكات و ضحكو معاها حتا هما، حطات لها كريمة كاس د اتاي قدامها و صاوبات لها طبيسيل فيه الفاكية و الكيك لي كيعجبها و لي صاوباتو لهاد السبب و خلات امها تتكلف تعطيهم لها و توجهها لشنو قدامها
-كريمة: ولفتي الرباط شوية؟ كنخاف نسول شي سؤال و نقلقك
-ايناس: لا بالعكس شوفي والله الا ولفت، خودي راحتك
-ام ايناس: انا براسي كنبغي نسولك و كنقول بلاش
-ايناس: غير سولو ا ماما را عادي
-ام ايناس: كيف كاديري دابا؟ واش علي لي كيدير لك كلشي ولا ديك السيدة لي جالسة معاكم؟
-ايناس: شريفة هي لي كادير كلشي كطيب و تجمع الدار و گاع داكشي ديال الروتين اليومي اما علي كيتكلف ليا بلباسي و صلاتي ملي كيكون
-كريمة: و نظافتك الشخصية و اي حاجة شخصية شنو كاديري فيها؟ عااارفاه سؤال محرج و لكن بالي معاك ا ختي والله ماديريهاش مني قلة صواب
-ايناس: كلشي كيتكلف بيه هو ا ختي من الاول حتا الاخير واخا مابغيتش و حشمت منو و لكن راك عارفة ماكاينة حشمة بين المرا و الراجل
-ام ايناس: الله يحفظو لك ا بنتي الحمد لله طلع ولد الناس و وقف معاك وقفة الرجال
-ايناس: عمري نلقى شي راجل بحالو و عمري ندم على اروع اختيار درتو فحياتي، ماغنحشمش منكم و غنقول بصريح العبارة بلي كنحماق عليه (ضحكات) نقولها لكم غير نتوما حيث قرابات ليا
-كريمة: دابا انا ماحاساش بالغيرة حيث حتا انا ربي كتب ليا راجل دايرني فعينيه و حتا انا نقدر نقول قدامكم بلي كنبغيه
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
