حكاية ظلام (مكتملة)

حكاية ظلام انت اختيار 88

داك العشا دوزوه و هما ساكتين، كيجاوبو نعمة و حكيم و يرجعو يسكتو و مرة مرة عينيهم كيمشيو لبعضياتهم هي كتهربهم اما هو كيركزهم فيها لتواني عاد يقلبهم لحاجة اخرى، ما خرج من ديك الدار حتا كان خذا قرارو و اللي لها لها، تسناها حتا ركبات طوموبيلتها و قبل ما تحرك كان صونا عليها و جاوباتو و هي كتشوف فيه و الخجل باين من حمرة وجنتيها

-سيف الدين: انا غنكون موراك

-هند: مازال الحال ماغنخاف والو

-سيف الدين: نتي ماخايفاش انا خايف، خلي لابيل دايزة

-هند: اوك..

تحركات و تحرك موراها و لابيل دايزة بيناتهم كيهضرو على كلشي الا على شنو وقع قبل العشا، تبعها حتا وصلات و سطاسيونا موراها و قبل ما تقطع معاه باش تنزل و تنزل ولدها كان حبسها بكلامو

-سيف الدين: بغيت نشوفك

-هند ضحكات: راك شفتيني

-سيف الدين: بغيت نجلس معاك، عندي مانقول لك

هزات عينيها فالمراية كتشوف فيه و هي شبه متأكدة من فاش باغي يهضر معاها و فكرات تقول لا و لكن ماقدراتش

-هند: واخا، فين و امتا

-سيف الدين: كنت غنقول لك دابا و لكن ولادنا مامعاونينيش، غذا مع 19 مزيانة؟

-هند: مزيانة

-سيف الدين: حتا نصيفط لك لوكاليزاصيون

-هند: داكوغ، مشات...

قطعات معاه و هزات ولدها و دخلات للعمارة من بعد ما شيرات ليه بايديها بمعنى "باي"، تسناها حتا دخلات و شعلات الضو د دارها عاد تحرك فاتجاه دارو.........

ديك الليلة دوزوها بجوجهم و هما حالين عينيهم غير كيفكرو و كياخذو فالقرارات لي ماكانوش عارفين بلي فالواقع راهم متناقضين مع شنو كيدور فبال بعضياتهم.....

فالصباح فاقت هند دارت روتينها الصباحي و هضرات مع مها و ختها اللي اكدو عليها باش تجي فالويكاند على قبل الصدقة، قطعات معاهم و فطرات هي و ولدها قبل ما تخرج تتقضا شنو ناقصها فالدار و غير رجعات دارت غذاها و بدات فالتخمال حتا صونا تيليفونها و كان سيف الدين، شدات معاه الهضرة حتا ارتاحت و ناضت كملات داكشي اللي بدات و ماسالات حتا كان ظهرها تقسم على جوج، تغذات هي و جاد مع العصر و غير جمعات الكوزينة نعسات ولدها و دخلات خذات لها دوش خفيف و منعش صحصحها، هضرات مع لاكخيش علماتهم بلي غترجع تحط عندهم ولدها ابتداء من الاثنين و عاد ناضت توجد راسها حيث 19 مابقا لها والو...........