حكاية ظلام (مكتملة)

حكاية ظلام انت اختيار 07

فصباح اليوم الموالي، فاستراحة ل 10، خرجات ايناس من القسم و وقفات فالكولوار كتركب النمرة د طبيبة نفسية طلعات لها فگوگل و لكابيني ديالها قريب شوية...
دوزات لابيل بتردد، راس كيقول لها بلاش غتقدري تتجاوزي الأمر بوحدك بلا حد ربي معاك و راس اخر كيقول لها غير جربي مغاتخسري والو..

و هي كتفكر، تفتح الخط و جاها صوت السكريتيرة
-السكريتيرة: بونجوغ، كابيني المالكي تفضلو

-ايناس: احم عافاك بغيت ناخذ رونديڤو عند الطبيبة و ماكرهتش يكون ليوم

-السكريتيرة: واخا واحد الدقيقة.... عاد تأنيلا غونديڤو كان مع 16، مزيان لك هاد الوقت؟

-ايناس: مزيان مزيان، شكرا بزااف

-السكرتيرة: مرحبا لالة...

قطعات و هزات راسها فالسما الصافية قدامها، تنهدات من الاعماق و هي كتقول باللي هادي خطوة للقدام و اكيد غتنفعها و ان شاء الله تتشافى...
قبل ما تعاود تدخل جاها ميساج و حتا بغات تسينياليه ماقدراتش حيث غير البدية ديالو خلاتها تدخل تقراه كلمة بكلمة

"لعشية غتلقايني فداركم، مابغيتيش تجاوبي اذن غندير شرع ايدي"

رجعات كلها كترجف، شنو غيجي يدير فالدار و باشمن وجه غيجي و قبل حتا ماتستوعب شنو قال رجع صونا التيليفون فايديها و كان هو، جاوباتو بعصبية
-ايناس: اش باغي اش كاااين

-جواد ببرود: بغيت نشوفك

-ايناس: انا ماباغاش نشوفك، شوفتك كتجيب ليها التقية عطيني بالتيساع

-جواد: ماشي مشكيل لعشية نشرب اتاي معاكم فالدار

-ايناس: واش نتا مريض؟ واش حتا دازت 6 سنين عاد راجع و راجع بوقاحة بحال مادرتي حتا شي حاجة؟؟

-جواد: دابا باراكة من الدراما، داكشي اللي درت را كيديروه الناس عااادي غير نتي اللي معقدة، دابا خلينا من هاد الهضرة الخاوية، بغيت نشوفك

-ايناس: سير تق***

قطعات عليه و دارت تدخل لقسمها لقات الطلاب اللي كانو خارجين فالاستراحة كيشوفو فيها عرفات راسها كانت كتهضر بالغوات، زادت تعصبات كثر ما هي معصبة و خوات عصبيتها فتلاميذها اللي كانو قاريين عندها من ل 10 ل 12........

مع 15:45 كانت جالسة فغرفة الاستقبال د لكابيني، رجليها كيتحركو بسرعة و كطرطق صبعانها و مرة مرة كتهز ايديها كتخلل شعرها بصبعانها و ترجع تجمعو بعشوائية..