دازت سيمانة طويلة عريضة على كلشي، خوات الدار على ايناس و مها حتا بقاو بجوجات مع ايوب اللي خلاتو ايناس يولف عليها و يبغيها كيف كيبغي خوها، هاد الاخيرة حسات بالملل خاصة و انهم 3 سيمانات و هما غير فالتوجاد و كيتسناو فشي حاجة دابا فاش داز كلشي حسات بحياتها خوات.......
فمساء يوم السبت، كانت هي و امها فاستقبال اسماعيل اللي رجع من السفر هو و مرتو، تعشاو مجموعين فجو عائلي تعاودو فيه على كي داز السفر و كيفاش داير الجو فالمدينة اللي مشاو لها، كريمة كانت هاديك الليلة هي اللولة لها فدار راجلها و تبعوها ليالي اخرين و ايام اخرين شافت فيهم المعاملة الحسنة د عگوزتها و د ايناس اللي اعتبرتها ختها ماشي غير مرت خوها......
***
فصباح يوم جديد، من بعد ما ودعات كريمة راجلها رجعات دخلات لفراشها تغمض عينيها حتا توصل الوقيتة اللي مولفة تطلع فيها، ماحساتش براسها حتا غرقات فالنعاس و ماضرباتها الفيقة حتا دخل عليها ولدها كيفيق فيها، حلات عينيها بتثاقل و هي كتشوف فيه و ناسية على راسها فين راها و شكون هي قبل ما تسترجع ذاكرتها و تنقز على تيليفونها لقاتها ل 11.... بدلات الشوميز اللي كانت لابسة بالزربة و طلعات للدار لقات ام ايناس جالسة فالفوطوي اللي فالمراح حاطة رجل على رجل و كل مرة تشوف فالساعة المعلقة قدامها...
-كريمة حشمات و تحرجات و دخلات تقابلات معاها: صباح الخير ا خالتي، كي صبحتي؟
ام ايناس حولات نظرها لايوب و نطقات بأمر
-ام ايناس: ولدي ايوب نزل لبيتك حتا نعاود نعيط لك
-ايوب شاف فماماه: و لكن انا بغيت نفطر و يلاه فقت
-كريمة: انا نوجد لك الفطور و نعيط لك
-ايوب: نقدر نهز تيليفونك نلعب بيه؟
-كريمة: واخا غير نزل
نزل ايوب كينقز بالفرحة في حين كريمة رجعات تشوف فعگوزتها اللي بقات على وضعيتها ماتحركاتش
-كريمة: خالتي انا نقاد الفطور و ننصب لغذا دغيا را ماحسيت براسي حتا داني النعاس
-ام ايناس: واش عند بالك عندي لوطيل انا هنا؟
-كريمة تدعقات: نعام!
-ام ايناس: غتبقاي تنعسي ليا حتا للظهر خدامة انا عندك؟؟
-كريمة: خالتي علاش كتقولي هاكا
-ام ايناس بحدة: خالتي خالتي كرهتيني فهاد الكلمة... شوفي الله يرحم باك سبعيام د لباكور مشاو، سالاو.. حطيتي رجليك فهاد الدار اذن غتبعي كلامي و شواري اللي غيكون، تبقاي ناعسة ليا تال اينا وقت و تخلي ليا الشقا فوق راسي ياك اودي لاباس؟ انا كبرت و عييت و ما حدك جيتي عروسة اذن غتكوني قد هاد المهمة
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
