ناضت من بلاصتها دارت روتينها الصباحي و دخلات للكوزينة لقات فطورها مغطي بحال ديما، كريمة و مها كيفطرو قبل منها و كيخليو لها حقها حتا كتفيق على خاطرها....
جلسات تفطر و تفكيرها غير فيه، على طول هاد المدة اللي دوزات و هي كتهضر معاه رجع هو الملجأ ديالها فكل مرة تبغي تهضر خاصة في ما يخص قرايتها و طموحها و شنو كتمنى من هنا اللي جاي، عمرها جبدات تجربتها الفاشلة فالزواج و هو عمرو جبد تجربة زواجو كيفما عمرهم هضرو على شي حاجة كتقلقهم، لا هي جبدات ختها اللي مختفية لا هو جبد البنت اللي ضرب بالطوموبيل فالليلة اللي ماتت فيها مرتو..........
و هي جالسة دخلات عليها كريمة بالكريشة اللي بدات تبان، نطقات "بالصحة" بابتسامة بادلاتها بنفسها هند اللي جاوباتها ب "الله يعطيك الصحة" قبل ما تعاود تنزل عينيها لتيليفونها كتعاود تقرا الميساج ديالو
"صباح الخير النعاسة ديالي، جيسپيغ تكوني نعستي مرتاحة و فقتي اونفوغم، انا دابا وجدت راسي باش نشد الطريق، غاتيقيني الا قلت لك فرحان حيث غنجي لكازا غير حيث غنكون انا وياك فنفس المدينة؟ ماكرهتش شي صدفة من عند الله تخليني نشوفك واخا غير خمسة دقايق، ماعليناش، نرتاح ان شاء الله من هاد الغرض اللي جاي على قبلو و نتفرغ لك ا هنودتي، ملي تفيقي جاوبيني، bizou et bonne journée ma belle "
طلات على الساعة فاش صيفط لها الميساج لقاتها 8 د الصباح و ديك الساعة اللي قراتو فيها كانت 10 و نص، يعني الوجهة ديالو مازال لها ساعة باش يوصلها.....
جاوباتو و كملات فطورها و هي مجمعة مع مرت خوها و مع مها اللي التحقت بهم، وجهها كان منور و كان باين اختلاف فملامح وجهها من شحال ماشافتوش فيها مها لدرجة علقات على تغييرها، هي براسها ماكانتش فاهمة باش حاسة و لكن بغات ولا كرهات كلامو كيخلي اثر ايجابي فنفسيتها....
وقفات على الماعن د الفطور غسلاتهم فالوقت اللي كريمة وقفات على الغذا كتوجد فيه و ما جات فين تسالي حتا كانو سمعو صوت لانطيرفون و شيرات لمرت خوها باش ماتعذبش حيث غتحل هي، مسحات ايديها فجلايلها و مشات ليه و مع قالت "شكون" مع وقفات مخرجة عينيها ملي سمعات جوج د اصوات دقة وحدة جاوبوها ب "قريب"، الصوت الاول كان د راجل جاها مألوف و لكن ماعرفاتوش و الصوت لاخر كان د امرأة، صوت كتعرفو مزيان خلاها بلاما تحس تنطق "ايناس"..................
للحظات بقات شادة السماعة مزيرة عليها حتا خرجات عندها كريمة
-كريمة: شكون؟
الصوت جا لهند مألوف بالزايد و كيشبه لديال ختها و لكن عقلها قال لها بلي مستحيل تكون هي، توقعات كلشي الا انها تجي برجليها و اللي زاد خلاها تنفي هاد الفكرة من راسها هو صوت الرجل اللي كان معاها، مدات السماعة لكريمة قبل ما تنطق "ماعرفتش" و تدخل لبيتها ملي سمعات لبكا د ولدها خلات مرت خوها عاود جاوبات
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
