فكازا، خرجات هند من بيتها من بعد ما نعسات ولدها لقات مها جالسة مع كريمة و ساكتات، وحدة خاشية وجهها فالتلفازة و الثانية فالتيليفون حتا هرسات بصوتها داك الصمت اللي كان فالبيت من بعد ما جلسات مقابلة مع مها و شادة فطرف السداري بايديها بجوج
-هند: ماما (سكتات حتا قلبات مها وجهها لعندها عاد كملات) مابغيتش داكشي اللي وقع البارح يتعاود، قولي لاسماعيل واخا يجي عندو واخا يبكي على رجليه مايعطيهش الوقت (شافت فكريمة) واش دوا معاه على جاد؟
-كريمة: ماعرفتش ا حبيبتي، ما قال ليا والو
-هند: واش خرج؟
-كريمة: لا ناعس لتحت
-ام ايناس: كي غانتفكو منو تاني؟ كيبان ليا ماناويش يعطيك بالتيساع
-هند: الله يجعلني نطيح عليه الباطل والله ما نتفاك معاه حتا نرجعو منين خرج، را عند بالو مازال ديك الدمدومة لي غايديرها تحت صباطو
-كريمة تعجبات: ويلي ا هند زعما ديريها؟
-هند: الا وصلات بيا للعظم والله حتا نديرها و نفوتها، بنادم وجهو قاصح ماكيتقشرش و ماغيفهمش بالهضرة كيفما درتها ليه المرة اللولة غنعاودها حتا المرة الثانية غير الفرق المرة اللولة ماظلمتوش و لكن هاد المرة غانديرها
-ام ايناس: نتي را وليتي كتخلعيني، اش بغيتي بشي حرام، خوك غيتفاهم معاه
-هند قلبات عينيها: انا قلت اخر حل ممكن نمشي ليه الا مابغاش يبعد مني
-كريمة: كون تتزوجي و ديك الساعة يبعد منك بالسيف عليه
ام ايناس ضيقات شوفتها فبنتها كتسنى جوابها، الا كانت فهمات شي حاجة البارح من نظرات سيف الدين لهند فراها فهمات بلي كاين الاعجاب الاولي و لكن واش بنتها مستعدة تعاود حياتها و تعاود التجربة مرة ثانية؟ هادشي اللي كتسنى تعرف من جوابها.....
ترسمات ابتسامة استهزاء على ثغر هند و هي كتشوف فكريمة و قبل ما تنطق كان تسمع صوت لانطيرفون و فنفس الوقت تسمع حتا صوت البكا د جاد اللي خلعو الصونيط، ناضت كتجري لعند ولدها في حين كريمة ناضت تجاوب فلانطيرفون
-كريمة: شكون؟
-قريب ا بنتي
الصوت كان صوت امرأة ما تعرفاتش عليه
-كريمة: شكون قريب؟
-ضيف الله ا ختي
عقدات حجبانها باستغراب و سدات لانطيرفون قبل ما ترجع عند عگوزتها
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
