حكاية ظلام (مكتملة)

حكاية ظلام انت النور وسط عتمتي 69 "نهاية الفصل الثاني"

وقفات ايناس فوسط الدار على اساس انها ماكتشوفش قدامها و ماعارفة فين تخطوي و عينيها على بنت عمتها لي لاحت صاكها فاقرب كرسي لها و جلسات حاطة رجل على رجل كطلع فيها و تنزل قبل ما تنطق باستهزاء

-كوثر: فين ا لعمية........

جمرة حاااارة تحطات على قلبها خلاتها تغمض عينيها و مذاق المرار ففمها و هي شبه متأكدة بلي اكفس حاجة ممكن توقع لشي وحدة جاياها فالطريق، عاود حلات عينيها كتشوف فالفراغ و هي كتسرق فيها الشوفة بلاما تعيّق

-ايناس: نتي عارفة بلي ماكنحملش هاد الكلمة

-كوثر ضحكات باستهزاء: مالي كذبت؟ عمية و ماكتشوفيش و يا ربي عمر داك الشوف يرجع لك (وقفات و تقابلات معاها و هي كتهضر بحرقة) انا بغيت ربي يخليك ديما عايشة فالظلام حيث بسبابك ضاعو احلامي و لقيت راسي خاسرة كلشي

ايناس بدات ترجف، ماقدراتش تستوعب شنو كتسمع، غمضات عينيها و هي كتحرك فراسها ب لا

-ايناس: عافاك قولي بلي غير شادة فيا و كتفلاي

-كوثر ضرباتها لصدرها حتا رجعات بخطوة اللور: ماكنتفلاش، كنهضر من نيتي، من صغرك و نتي هي الواعرة فالعائلة، هز ايناس حط ايناس ديرو الخاطر لايناس باها ميت عطيو لايناس لي بغات راها يتيمة وصلات بيا حتا وليت كنتمنى يموت با باش يفششوني كيف كيفششوك، خويا لي خويا و ماكانش كيعقل عليا و فالمقابل غير كتعيطي ليه نتي كينوض يجري لعندك تقولي موكلاه مخ الضبع، كنمشي حتا كنكرهك و كنقول حشومة لعني الشيطان كتبقى بنت خالك و صاحبتك و نتي عزيزة عندها و لكن باش توصل حتا للسيد لي كنت حاطة عليه العين لسنين و كنت كنحلم بالنهار لي غنتجمع بيه فيه و تجي نتي بسهولة تطيريه مني هي لي ماتدوزش لك

القدرة باش غتبقى ايناس واقفة على رجليها مابقاتش، طاحت على طولتها و دموعها مغرقين عينيها و لكن رافضين ينزلو، كتيفاتها تقوسو بالحزن و ملامح وجهها تكساو بالصدمة و هي كتسمع لها

كوثر تبسمات جنب و هي كتشوفها قدامها منهارة و عرفات راسها بدات توصل لمبتغاها، حافظاها و عارفة طريقة تفكيرها كيفما عارفة حتا التصرف لي كادير فاش كيضيق خاطرها و كتقلق، تحنات لمستواها و كملات بخبث

-كوثر: كنبغي علي و كنحماق عليه و كنقسم لك بالله حتا غنطيرو لك (شدات فوجهها بصبعانها و خلاتها تشوف فاتجاهها، ماكانتش عارفة بلي كانت بصح كتشوف فيها) كنموت عليه و كنتسطى عليه و الا ماديتوش غنحماق، درت لي ما يدار باش تبعدي عليه والا بغيتي تفاكي، لصقة لصقة ا بنادمة وااالو ماكتقشريش (طلقات منها و طلقاتها بضحكة و هي كتسترجع شنو دارت قبل) عقلتي على الميساجات لي كانو كيوصلوه كيقولو ليه يبعد منك حيث نتي ق*** و كتصيفطي تصاورك للرجال؟ انا مولاتهم، تصاورك المعيقين سرقتهم لك من تيليفونك و صيفطتهم ليه على اساس انا راجل و دايز عليك..
دموعها حايفا سجام مصحوبين بشهقات و هي كتحرك فراسها ب لا و سادة وذنيها رافضة شنو كتسمع، باش تكون اكثر وحدة كثيق فيها دارت فيها هادشي ماقدراتش تتقبلها، باش تخونها هاد الخيانة عمرها فكرات فيها......