مع 17، كانت ايناس جالسة مع ابتسام فطيراس كيطل على البحر، الهواء البارد و الجو د البحر كان لهم تأثير سحري عليها خلاوها تسترخي و يتهدنو اعصابها و على هادشي بالضبط اختارت ابتسام داك الكافي...
-ايناس: احسن بلاصة اختاريتي هي هادي
-ابتسام حاضية ملامحها: البحر كيخفف من التوتر و الاجهاد النفسي، غير من الوقت اللي جيتي فيه لدابا ملامحك تهدنو و مابقيتيش عاقدة غوباشتك
-ايناس تبسمات لها: ماكنتش عارفة بلي هاد الجلسة هي حصة فالواقع
-ابتسام: على ذكر الحصص، علاش ماكملتيش مع الطبيبة ديالك؟ ملي حبستي و انا كل مرة نتسناك تجي لعندي او عل اقل تهضري معايا
-ايناس حدرات راسها كتجمع شعرها اللي تخبل قدامها بالهوا: حسيت براسي مابقيتش محتاجة للحصص
-ابتسام: غير قبيلا فاش هضرت معاك قلتي ليا محتاجة نهضر حيث غنطرطق
-ايناس: بغيتي الصراحة؟ ماريحاتنيش ديك الطبيبة
-ابتسام: و علاش ما جيتيش عندي؟ علاش ما رجعتيش؟
-ايناس: حشمت، كنقول غتفهميني غلط و تقولي رجعات غير على قبل مصلاحتها
-ابتسام: واش نتي حمقة؟ بطبيعة الحال غتقلبي على مصلاحتك فين كاينة و تمشي لها، الا كانت مصلاحتك عندي رجعي اصلا انا اقترحت عليك تبدليني غير باش تكوني مرتاحة و بما انو الطبيبة لوخرى ما ريحاتكش كنتي ترجعي عندي
-ايناس: نقدر نرجع دابا؟
-ابتسام: اه اه تقدري ترجعي فاي وقت، بابي مفتوح لك فاي وقت...
تسناو السرباي حتا حط لهم داكشي اللي طلبو و كملات ابتسام
-ابتسام: دابا قولي ليا مالك؟ علاش ما بيخيرش؟
ايناس للحظات بقات ساكتة و ساهية فالبحر قدامها و كتفكر غير ديك العراضة و شنو عرفات فيها، نسات الموقف اللي جمعهم الصباح و نسات اي نظرة شافتها منو قبل او احساس حسات بيه من جهتو، كتفكر غير رأيو فيها
-ابتسام حطات ايديها على كتفها فيقاتها: ايناس انا كنسمع لك
-ايناس: انا اكتشفت بلي طلعت اكبر مغفلة
-ابتسام باستغراب: علاش كتقولي هاكا؟
-ايناس: السيد اللي كنت عاودت لك عليك
-ابتسام قاطعاتها: علي! مالو
ايناس تحرجات و سكتات حيث ماقدراتش تهضر عليه نيشان بصفتو خوها ماشي شخص غريب و حتا ابتسام فهماتها
-ابتسام: ايناس انا بغيت نشوفك ليوم حيث ناوية نهضر عليه داكشي علاش جيتك نيشان، قولي ليا شنو واقع باش نقول لك حتا انا اش عندي
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
