سيمانتهم دازت بروتينها المعتاد غير بفرق وحيد انو التيليفون مابقاش كيفارقهم، داخلين كيهضرو خارجين كيهضرو عاد لي ميساج فوقت خدمتهم حدث ولا حرج و على حالتهم بقاو حتا وصل نهار السبت اللي كان جا فيه هو و كانت معروضة فيه هي و عائلتها مع دار عمتها للعشا فدار واليديه.....
كانت واقفة قدام مرايتها لابسة جلابة د الحضور و كتلبس فمگانتها مع الخاتم اللي كادير فسبابتها، دارت ميكاب نو ميكاب كيف مولفة و شعرها جمعاتو على شكل شفنجة و خلات گصتها مطلوقة، غير رضات على شكلها دارت باش تهز صاكها قبل ما تقشع الشال اللي كتصلي بيه و تفكرات كلامو، خذاتو بين ايديها و عاود وقفات قدام المراية كتجربو على راسها و كتشوف كيف جا معاها، رجعات جلسات شاداه بين ايديها و كتفكر مليا فكلامو سواء اللي قال لها فنهار التعارف "غنكون فرحان الا درتيه" او فكلامو نهار العقد "ان شاء الله تفرحيني و ديريه بلاما نحتاج نهضر عليه" و حتا فكلامو يوم السبت اللي فات "نتي محمقاني و زدتي حمقتيني و نتي دايرة الحجاب، جا معاك بزاف"
و هي فعز تفكيرها دخلات عليها مها اللي ضربات فخاضها ملي لقاتها جالسة
-ام ايناس: واش نتي عاد مازال جالسة؟؟ نوضي را تعطلنا على الناس حشومة
-ايناس: مازال الحال ا ماما غير ارتاحي
-ام ايناس قشعات الزيف اللي فايديها: شنو كاديري بعدا!
-ايناس: اجي جلسي حدايا بغيت نستاشر معاك
-ام ايناس: الله يسمعنا خير
-ايناس دارت الزيف على راسها: اش بان لك نديرو؟
-ام ايناس: وا شوفي نتي شنو باغا، شحال هادي كنتي درتيه و حيدتيه تخافي غير ديريه حتا هاد المرة و تعاودي تحيديه
-ايناس: انا دابا بصح باغا نديرو، الا جينا نهضرو فالواقع را مفروض عليا، ماشي بخاطري نقول بغيت او مابغيتش نديرو او لا؟ تبارك الله طالعة ف 26 عام امتا غنديرو حتا نشرف زعما؟؟ دابا جلست مع راسي لقيت بلي ماعندي حتا حاجة تحبسني، كنقول من بعد من بعد و لكن علاش من بعد؟ الله و علم
-ام ايناس: واش راجلك اللي مخليك تقولي هاد الهضرة ؟ بززو عليك؟
-ايناس: لا بالعكس، ديك السيمانة شافني دايراه و انا كنصلي و عجبو، و من قبل حدو كيقول ليا غنكون فرحان الا درتيه عمرو فرضو عليا، دخل ليا الفكرة غير بالخاطر و بلا مجهود گاع
-ام ايناس: اوا ا بنتي الا كنتي متأكدة ماغتعاوديش تحيديه ديريه، انا من عندي الله يسخر
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
