فكازا و بالضبط فالدار د ام عمر، فبيتها كانت جالسة كوثر مكورة على راسها كتبكي، ماكرهاتش تبكي الد•م فعيواض الدموع من المصيبة اللي طاحت على راسها، كانت كتظن بلي ديك العصى اللي كلات من عمر و اللي عاود كلات من باها و من بلال شفعات لها و الكلام اللي قطعو معاها كافي كعقاب لها و لكن هادشي اللي ناويين يديرو لها مستحيل تتقبلو و مستحيل توافق عليه واخا تعرف تهرب ولا تقت•ل راسها المهم ماغاديروش......
دخلات عليها مها و هي قالبة عليها وجهها حتا الشوفة ماكتكملهاش فيها، لاحت عليها قفطان جوهرة خفيف و نطقات بحدة
-ام عمر: نوضي تلبسي ما بقا لهم والو و يجيو
-كوثر بالدموع: مالابسااااش
-ام عمر: غتلبسي بالسيف عليك الا مالبستيش غيجي اللي يلبسك بلا خاطرك نووووضي
-كوثر بانهيار: واش ماحشوماش عليكم؟ تزوجوني لواحد ماكنعرفوووش و يعلم الله كيف دااير، واش ماشي بنتكم انا؟ واش نستاهل هاد اللوحة اللي غتلوحوني؟
تلاحت عليها مها بنتفة مجننة و هي كتبكي معاها
-ام عمر: نتي اللي درتيها لراسك ماخليتي ليا ما نخبي ما نغطي، ماعندي ما ندير لك
-كوثر بتوسل: عافاك ا ماما عاونيني، مابغيتش نتزوج
-ام عمر مسحات دموعها بنرفزة: ما كاين كلام فوق كلام باك و خوتك، نوضي وجدي راسك راهم جايين للعشا يشوفوك و يتافقو على كلشي
-كوثر بانفعال: وا مابغيتش نتزوج مااااااابغيتش مابغيتش
غواتها و انفعالها كان بالطلعة د بلال و مرتو اللي جاو على قبل العشا و سمعوها، قرن حجبانو السود و دخل محمر فيها نيشان لوجهها شدها منو حتا تطراساو ظفرانو فخدودها اللي هرب منهم الد•م و غزز على سنانو
-بلال: جوج كلمات قلناهم و ماغنعاودوهمش، غتزوجي هي غتزوجي و هذا اللي جاك غتاخذيه سوا بغيتي ولا مابغيتيش، هاد الدار هي اللي ماغتبقايش جالسة فيها و ماغتبقايش محسوبة علينا
دموعها انهار و شفايفها كيترعدو و هي كتشهق، معاملتهم معاها ولات معاملة الحشرة و الحشرة و معطية لها القيمة اللي ما بقاتش عندها هي، توسلات لمها بعينيها حتا فكاتها من ايدين خوها اللي دفعها و خرج مخليهم
-كوثر بانهيار: عايش فالعروبية ا ماما و كبر مني را عندو 48 عام، واش نستاهل هاد التزويجة؟
شافت فيها مرت بلال و هي كتحرك فراسها ب لا حول و تبسيمة د الاستهزاء عالية وجهها قبل ما تسمح فيها حتا هي و تخرج تابعة راجلها في حين ام عمر جبدات بنتها من ايديها و وقفاتها
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
