داك النهار كان من بين الايام لي كيبقاو محفورين فالذاكرة ماكيتنساوش سواء بولادة كريمة لأمورة غزالة بحالها او بخبر حمل ايناس، اليوماين لي موراه دازو غير بين الكلينيك و الطبيبة د ايناس و حتا بالتوجاد للرفيسة لي غتكون فنهار ثلاث ايام، فدوك الايام لي دازو هضر سيف الدين مع واليديه و علمهم بشنو كاين و الموضوع على قد ما فرح مو على قد ما تصدم منو باه لي ماتوقعش نهائيا غيجي النهار غيدير فيه ولدو عقلو و يهتم ببنتو و يتزوج گاع....
السيمانة دازت غير فالتحضيرات للسبوع حتا وصل المساء د السبت، دخلات هند لبيتها هربانة بولدها من الدار لي عامرة و من الهضرة و الضحك العالي باش ينعس، تكات حداه كتنعس فيه و فنفس الوقت كتميساجا مع سيف الدين لي تعطل عليها بربع ساعة عاد رجع جاوبها
"هند: فين تعطلتي؟
سيف الدين: كانت عندي ابيل، هاني معاك دابا.. نعس جاد نعيط لك؟
هند: مازال، كيسمع الحس برا البيت كيتبرزط، باغي غير يلعب
سيف الدين: ماشي مشكل، نصبرو حتا ينعس ا لالة
هند: حددتو النهار؟
سيف الدين: انا نهار؟
هند: هضرتي مع واليديك؟
سيف الدين: علاياش؟"
قرات الميساج و عاوداتو، كيفاش علاياش؟ سيمانة و هي كل ليلة كتسناه يجبد معاها الموضوع يقول لها شنو قال ليهم، باش جاوبوه، علاياش تافقو و دابا فاش سولاتو نيشان كيجاوبها اجوبة فشكل!
ماجاوباتوش، حيدات لفيبرور لتيليفونها و داتها فولدها عطاتو وقتو حتا نعس عاد خرجات لعند عائلتها جلسات معاهم حتا تعشاو خلات تيليفونها غيحماق بلي زابيل و لي ميساج و ما هزاتو حتا كانت وصلات ل وحدة د الليل، قرات ميساجاتو لي فيهم "فينك"، "جاوبي" و "مالك" و لكن داكشي اللي بغات تعرف ماجبدوش، الوقت باش تعيط ليه و يبقاو شادين الهضرة مشا و خاصها تفيق بكري على قبل الذب•يحة و على قبل السبوع داكشي علاش خشات التيليفون تحت مخدتها و نعسات و فدوك الاثناء كان هو متكي حاط ايديه بجوج تحت راسو و عينيه على السقف بابتسامة، كيفكر فشنو تابعو و كيفكر فيها هي نيت لي عارفها تقلقات و لكن باش المفاجأة تبقى بحلاوتها هادشي اللي دار هو لي خاصو يدار.......
فصباح يوم الاحد، تكلف اسماعيل و علي بالذب•يحة في حين البنات تعاونو على الروينة حتا سالاوها و كملو التوجاد د داكشي لي بقا ناقصهم على قبل ضيوفهم و ما جات فين توصل العشية حتا كانو متأنقات بقفيطنات كيستقبلو فضيفاتهم، تجمعو النسا فالصالون و تطلق الشعبي لي خلا الحاضرات يتهزو و يسخنو الطرح و من بين دوك النسا كانت ايناس لي كتشطح غير هاد المرة شطحات بالعقل اولا حيث تعلمات من الدرس الاول و ثانيا حيث وصاها علي ماتنساش راسها حاملة و تعطيها للركيز....
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
