رجعات ايناس للدار بملامح حادة، دخلات لبيتها مفقوصة ماقدرات حتا تجلس مع مها و خالتها، كتمشي و تجي و هي كتزفر و كتأفف، حاسة براسها مخنوقة و خاطرها ضارها من شنو دارت ختها و كون غير كانت ندمانة، بوجهها القاصح كتقول بلي دارت اللي دارت على قبل راجلها، راجل هاداك اللي يخلي مرتو تطيح جنينها غير حيث مابغاش جسدها يخسر؟؟ كتسول راسها و كتهضر غير بوحدها و هي كتبدل فحوايجها... خرجات عند مها و خالتها جلسات معاهم علاما جا اسماعيل حتا هو و تعشات معاهم بلا خاطر، ديك الليلة دازت عليها طويلة و هي كتسنى غير امتا تمشي عند ابتسام، متناسية اي حاجة اخرى و عقلها غير فختها و الموصيبة اللي دارت..........
صبح الصباح و رسلات الشميسة خيوطها الذهبية خلاتها تحل عينيها و حجبانها معقودين، دوزات نهارها بخمول و ملل، الخدمة اللي كانت كتلاهيها و كاتخلي بالها مشغول ها هي سالات منها و شدات العطلة......
مع 16 كانت واقفة قدام الغرفة د الطبيبة، دقات حتا سمعات "oui" عاد حلات الباب و دخلات، ابتسام غير شافتها وساعت ابتسامتها و وقفات مستقبلاها بالاحضان، بادلاتها ايناس التعنيقة بود و جلسو مقابلات مع بعضياتهم كيسولو على الاحوال قبل ما تبدا الحصة........
ابتسام ردات لبال لابتسامة ايناس الباهتة و حجبانها اللي كتعقدهم حتا كتحس براسها و ترجع تفكهم و هي مهربة عينيها منها و نطقات مسولاها
-ابتسام: ايناس رجعتي مترددة باش تجي لعندي؟ ماتيقتيش كلامي د نهار السبت؟
-ايناس: لا بالعكس، كون ماتيقتكش مانعاودش نجي فقط بالي مشغول و مخنوقة بصراحة و هادشي ماعندو حتا علاقة بك والله
-ابتسام: شنو شاغل بالك
-ايناس بحزن: كيفاش ام كتقدر تضحي بجنينها على قبل
راجلها غير حيث هو ماباغيهش و كتعطيه الاعذار من الفوق بحال كتغطي جريمتها و كتمسحها فيه
-ابتسام: عاودي ليا غير بشوية باش نقدر نفهمك و نعاونك
ايناس عاودات لها بالتفاصيل شنو دارت هند من الحالة اللي لقاتها فيها لكلامهم كولو من الاول حتا الاخير
-ايناس: كتقول بلي الا تبدلات و رجعات كيف كانت اكيد غيتبدل حتا هو و ماغيبقاش كيف داير دابا، ديما عاطياه الاسباب باش تدافع عليه او باش تتقبل داكشي اللي عايشة
-ابتسام: فهمتك، ختك ا ايناس عندها تعلق مرضي و مدمنة على راجلها، هادشي اللي قلتي دابا كيبين بلي هي فحالة انكار، مكتشوفش العلاقة و ديما مخبية مورا الاسباب.... مشاعر التعلق و العاطفة رجعو عندها بهوس و مابقاتش قادرة تسيطر عليهم و بما انك قلتي ليا بلي هددها غيجيب التانية الا ماتبدلاتش كوني متأكدة بلي هي غادير اللي كان باش مايخليهاش حيث حبها ليه رجع مرضي....
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
