فعشية يوم الاحد، هزات ايناس طوموبيلتها فاتجاه دار ختها بلاما تعلمها، كانت متأكدة بلي غتلقاها فالدار بما انها مريضة و الوحم باين جاها صعيب هاد المرة....
مسافة الطريق و كانت واقفة قدام العمارة اللي فيها الشقة د ختها، دورات عينيها فارجاء الحي كتقلب على طوموبيلة زهير مالقاتهاش عرفاتو مكاينش، طلعات كتجري فدروج العمارة حتا وصلات للشقة و بدات تدق...
دقانها كان غادي و كيعلى خاصة ملي جاها صوت البكا د جاد من لداخل و حتا واحد ما كيحل ليها، الشيطان بدا يوسوس لها و الخلعة بدات تحس بها و حتا حلات صاكها باش تجبد تيليفونها و تعيط لاسماعيل يجي يلحقها، تحل لباب و بانت موراه هند و شكلها مكيبشرش بالخير، وجهها صفر و هارب منو الد•م و كان باين بلي ماقادراش توقف غير من الطريقة باش مسندة على الباب، جاد غير بانت ليه خالتو وتيرة بكاه تزادت و حل ليها ايديه و هو جاي لعندها و ماسكت حتا هزاتو و بدات تراري بيه و عينيها غير على ختها...
هند غير بانت لها ايناس قدامها تحلو عينيها على وسعهم و بلاما تحس مسحات وجهها بايديها و دوزاتها على شعرها بحال كتحاول تخبي حالتها بديك الطريقة و هي مهربة عينيها منها، عطاتها المجال باش تدخل و رجعات سدات الباب و هي حاسة بالوجع كيقطع فيها و لكن باش ماتبينش لختها، تعالات على راسها و صبرات و تبعاتها لبيت الجلاس جلسات مقابلة معاها
-هند: كلشي بيخير؟ كي داز لبارح؟
كتهضر و عينيها كيتقلبو، صابرة بزز على الالم اللي حاسة بيه
-ايناس: هند مالكي؟؟ راكي ماشي بيخير واش نديك للطبيب؟
-هند: لا لا انا بيخير
-ايناس: علاش جاد كيبكي و علاش ماحليتيش دغيا؟ وجهك صفر ا صاحبتي را كتباني ماشي بخير، واش مخبية عليا شي حاجة ؟
-هند: را غير الوحم، شاداني الدوخة و مكناكلش، اللي كليتو كنتقياه
ايناس ماجاوباتهاش، نزلات عينيها لجاد لقاتو نعس بين ايديها
-ايناس: مسيكين كان كيبكي حيث فيه النعاس، غنديه لبلاصتو
-هند بسرعة: لا غير خليه هنا حدانا بلاما تديه للبيت
-ايناس عقدات حجبانها: علاش؟؟
-هند: وا والو ا ايناس صافي حطيه تما و هنينا
قوسات ايناس شفايفها و علات كتافها بلا مبالاة و فالوقت اللي وقفات باش تحطو و عطاتها بالظهر، ناضت هند بالزربة كتجري دخلات للحمام و سدات عليها كتعصر و كتغوت، ماقدراتش تزيد تصبر على الالم اللي شادها و هي حاسة بحال شي حاجة غتنزل لها من لتحت، ايناس غير سمعات غواتها تبعاتها و وقفات فالباب كدق عليها و هي مخلوعة
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
