حكاية ظلام (مكتملة)

حكاية ظلام انت اختيار 45 "نهاية الفصل الاول"

ايناس دخلات لبيتها تبدل قفطانها بجوهرة خفيفة بلا حزام و فنفس الوقت ترتاح على ما يتحط العشا و يعيطو لها، فالوقت اللي تلاحت على سريرها عاطية الراحة لعظيماتها وصلها ميساج من علي فيه "انا فالصالون لتحت، نزلي عندي" قفزات من بلاصتها لبسات بلغتها و لاحت زيفها على شعرها قبل ما تنزل لعندو بلاما تعلم شي حد، دخلات لدار خوها اللي كان مشعول فيها غير الضو د المراح مع حلات الباب مع بان لها جالس نص جلسة على الطبلة حاط رجل على رجل و هو لابس جلابة رجالية فاللون الابيض خلاتو يبان مختلف كل الاختلاف على شكلو و هو لابس كوستيم، طلعاتو و نزلاتو بنظرات اعجاب و هي مقوسة شفايفها و كتحرك فراسها فوق و تحت و كتقرب منو

-ايناس: هاي هاي هاي على التيتيز عاوتاتي، تبـــــارك الله

-علي خرج صدرو بغرور و رفع راسو للفوق: باش تعرفي راسك خذيتي الزين

-ايناس ضحكات: خذيت التبوكيصة (زادت قربات منو حتا شدات حناكو بين ايديها عجناتهم) يخلي ليا حبينوو اناااا

-علي عاود لها نفس حركتها: يخلي ليا غزيلي انا

-ايناس تلاحت عليه معنقاه: توحشتك بزاااااف

-علي زير عليها: مابقا قد ما فات، صبرنا 6 اشهر، ليلة وحدة مادات ما جابت و ان شاء الله نبقاو مجموعين لديما

-ايناس: ان شاء الله (بعدات عليه بلطف) غذا ان شاء الله غيجيبني اسماعيل من عند الميكاب ارتيست

-علي: نتسناك انا فالقاعة نيشان؟

-ايناس: وي

-علي: اوك اتفقنا (عاود عنقها) يا ربي امتا يجي غذا خلاااااص اوووو ماخرج هاد الانتقال حتا بغا ربي يغفر ليا الذنوب

-ايناس: والله الا دارو معانا المزيااان، قول الحمد لله ربي يسر لنا

-علي: الحمد لله (تفحص وجهها بعينيه) كتباني عيانة؟ اليوم بعدا ماوقع لك والو ياك؟ ماتلوات لك رجليك ما ضربتي جبهتك

-ايناس ضحكات: لا الحمد لله دازت طريفة واقيلا غير حيث ماتقاديتش مزيان، غذا عاد نشوفو اش غيوقع ليا هههه

-علي ضربها بخفة لراسها: الله يستر، واش بيك شي حاجة ؟

-ايناس تفوهات: بغيت غير ننعس، لبارح بقيتي مسهرني و فقت بكري دابا باغا غير نتلاح ننعس و مازال الليلة طويلة ماعرفت كي غنصبر

-علي: ماتصبريش، طلعي دابا كولي شوية و نعسي، غذا ان شاء الله تابعك نهار طويل