فالمساء، ايناس كانت فبيتها فدار عگوزتها من بعد ما حطها علي و بقا معاها حتا جات مو و مرت خوه مع ابتسام و بنتها عاد وجد راسو هو و خرج للعشا فدار صاحبو مع باه و خوه....
فالتحت كنزة كانت فالكوزينة واقفة على العشا كتنصب فيه بقلة حيلة، حاولات تولف هاد المهمة الجديدة اللي رجعات عندها و لكن ماقدراتش، حتا كتبغي دير شي مصيبة فراسها باش يعفيوها كتخاف و كترجع باللور، و هي كتنقي فالخضرة دخلات عليها ابتسام اللي مشات للطابلية نيشان هزاتها لبساتها و موراها دخلات ام علي بخطواتها الثقيلة و جلسات فالطبلة كتشوف فيهم اش كيصنعو
-ام علي: داكشي اللي وقع لايناس ماكيعجبش، خاص ديما الواحد يبقى معاها و مايخليهاش بوحدها
-كنزة: عادي، هاد المواقف غتبقى طيح فيهم بزاف خاصها تولف
-ام علي: الواحد خاصو يتعلم مايجرحش بكلامو، شنو فيها كون هضرات بشوية؟ ضروري دور فيها و تعيرها، يعلم الله بحالها مسكينة، ماقدرتش گاع نطلع نشوفها
-ابتسام: راها بيخير، انا عاد نزلت من عندها خليتها مزيانة، مابغيتش نزلها قلت حتا نساليو
-ام علي: كون غير نزلتيها ماتبقاش بوحدها، تتوانس معانا شوية
-ابتسام: انا نعيط على سمية تهبطها
-كنزة غسلات ايديها بسرعة: غير خليها، انا نيت طالعة لبيتي ندوز عليها و نهبطو بجوج
-ابتسام قوسات شفايفها و حركات راسها بالايجاب: واخا
تبعاتها ام علي بعينيها حتا خرجات و رجعات تشوف فبنتها
-ام علي: ماعرفت شنو غنقولو لهم على شريفة، ها هي دابا معاهم و لكن من هنا لشهر 9 غادي تولد بنتها و غتمشي تجلس معاها و غيخصهم اللي يبقى معاهم
-ابتسام: ا مي را حنا مازالين يلاه فشهر 5 فينو شهر 10 اللي كتفكري ليه من دابا
-ام علي: يلاه نفكر ليه من دابا باش نلقاو الحل، شنو يبقاو ماعارفينش حتا نوقفو على اللي يعاونهم؟
-ابتسام: فهمتك، خلي بعدا غير حتا يقرب الوقت و ديك الساعة يحن الله
-ام علي: حتا انا ماكرهتش اللي تعاوني هنا، كنزة ماكتبردليش القلب، الحاجة باش ديرها كتجلس عليها عماين
-ابتسام: ياك قلتي زكرياء مابغا حتا شي وحدة تدخل عليكم ماكيعرفهاش؟ تخافي تجيبي شي وحدة و ينوض الصداع تاني
-ام علي: انا هاداك الولد را قهرني، مؤخرا ولا بينو و بين مرتو الصداع و النگير، دوك الدراري اللي جامعينهم گاعما بقاو مسوقين ليهم مازال
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
