فكافي ريسطو عائلي جا كيطل على البحر و مختص غير فالحوت، خذاو لهم طوابل جمعوهم على شكل طبلة طويلة تكفيهم كلهم، جلسو النسا حدا بعضياتهم و فجنبهم عمر و فاروق ولد ابتسام و قدامهم جالس كريم مخليين ل علي بلاصة فراس الطبلة....
شكلو ثنائيات مع بعضياتهم كل جوج فاش كيهضرو و من بينهم ايناس و كوثر اللي كانو جالسات حدا بعضياتهم و كان باين على هاد الاخيرة بلي مافرحاناش و مامرتاحاش و هادشي انتبهت ليه ايناس
-ايناس باهتمام: كوثر بيك شي حاجة ؟؟
-كوثر بابتسامة باهتة: لا، اش غيكون بيا؟
-ايناس: ماعرفتش، كتباني مقلقة
-كوثر: لبارح بقيت شادة الهضرة مع امينة فواتساب ما حسينا بالوقت حتا وذن الفجر و دابا حاسة براسي غيتفرگع، بغيت غير نعس
-ايناس: واش امينة بنت عمتي عيشة؟
-كوثر: و شكون من غيرها
-ايناس: لاباس عليها؟ اش كتعاود و امتا غتجي؟
-كوثر: قريب ان شاء الله، ختها لقات اللي يشد لها لبيبي يعني مسألة وقت و صافي
-ايناس: 6 شهور و هي فالعيون غتكون ولفاتها، دابا غترجع لكازا غتجيها فشكل
-كوثر: لا لا ماولفات گاع، اصلا مشات غير بزز كون ماشي مها اللي زيراتها گاعما تمشي
-ايناس: تعتابرها صدقة، را هي اللي عند ختها و الا ما وقفاتش معاها فبحال هاد الظرف شكون يوقف معاها؟
-كوثر: بصح و لكن هي ماعندهاش مع البز الصغير، ختها كتخرج تخدم من 8 ل 5 و هي هاد الوقت كولو كتهتم ببيبي صغير را مسؤولية
-ايناس: و لكن هي قدها
-كوثر: حتا خرجات منها بالخلعة، كتعاود ليا بعض المرات كيبقى كيبكي غير بوحدو ماكتعرف حتا اش بيه و ماكيسكت حتا كيبغي يسكت ليها هي القلب
-ايناس: هههه عادي عادي، مهم خذات تجربة غتنفعها ملي غتزوج ان شاء الله
-كوثر: ان شاء الله....
قلبات كوثر عينيها فاللحظة اللي علا فيها كريم راسو من تيليفونو و تلاقاو عينيهم، فرفرات بشفرانها بغرور و رجعات بدلات منحى نظراتها بتمييقة خلاتو علا حاجبو بابتسامة سخرية و هو كيقول فخاطرو "هادي مالها"....
من بعد ما دازت نص ساعة على جلوسهم، لحق عليهم علي اللي كان بدل حوايجو و طرف حالتو، سمية و فاروق غير بان لهم قفزو من بلايصهم و تلاحو عليه معنقينو وسط ضحكو هو، ابتسام و ريم بدورهم مابقاوش جالسات، وقفو حتا عنقوه و باركو ليه عاد جات النوبة د عمر و كريم في حين ايناس و بنات عمتها ماتحركوش تسناوه حتا جلس بلاصتو و سبقاتهم سليمة باركات ليه و تبعاتها حتا كوثر و هو جاوبهم و هو حادر راسو...
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
