حكاية ظلام (مكتملة)

حكاية ظلام انت اختيار 10

وقفات الطوموبيل د اسماعيل قدام الدار د كريمة، نزل منها و هو هاز ساشيات من المخبزة، مابغاش يدخل بايديه خاويين و هما عارضين عليه يدير معاهم كسكروط.....

حل ليه ايوب الباب و دخل جارو من ايديه و الفرحة باينة فعينيه اللي كيبريو، من اول مرة فاش عرفاتو عليه ماماه و هو مرتاح ليه خاصة و انو اسماعيل شاد ليه الخاطر و فكل مرة يكون غيتلاقاه ضروري مايجيب ليه شي حاجة معاه........

دخل اسماعيل للصالون لقا الطبلة واجدة و كيتسناوه غير هو، باس لخالة كريمة راسها و مد ايديه لخطيبتو اللي فرحتها مكتقلش على ولدها و جلس مجلس ايوب فوق رجليه حتا نطقات الخالة خلاتو يهز فيها راسو
-الخالة: ايوب حشومة اجي حدايا خلي عمي ياكل على خاطرو

-اسماعيل: لا غير خليه، مامديرونجينيش

دار معاهم كاسكروط و هو حاس باللي غير هو اللي كياكل و هما غير كينقبو و كان باين بلي مخبيين شي حاجة او كيوجدو يقولو ليه شي حاجة

-اسماعيل: واش واقعة شي حاجة ؟ ملي جيت و نتوما ساكتين

-الخالة تنهدات: كاين ا ولدي، والله ما عرفنا كيف غنقولوها لك

-اسماعيل شاف فكريمة: كريمة شنو واقع؟؟ ياك لاباس ؟

كريمة نزلات راسها محرجة و تكلفات خالتها بالجواب

-الخالة: ولدي جواد كيقلبو عليه البوليس

اسماعيل تصدم، حط ايوب حداه و تقاد فجلستو مركز معاهم: علاش مالو؟

-الخالة: لبارح ضرب مرتو و دارت بيه شكاية و كون غير كانت غير هي..

نزلات راسها هربانة من عينين اسماعيل اللي ما فهم والو، رجع شاف فكريمة و غمزاتو بمعنى "من بعد" و حتا هو ما عاودش هضر..

-الخالة: الحمار عييت نقول ليه عطيها بالتيساع طلقها الا ماكنتوش مفاهمين و ماتحطش عليها ايديك و هادي ماشي اول مرة، شحال من مرة دارها و كنمشي نطلبها و كتنازل ليه و لكن هاد المرة مابغاتش، حصلات الكلب كيهضر مع شي وحدة فالتيليفون و فعيواض ما يخلي لما منين يدوز ناض عطاها سلخة د العصا

-اسماعيل: واش هو دابا مشدود؟

-الخالة: لا هربان، الله يا ربي و كي غاندير معاه عييت والله حتا عييت

-كريمة: واقيلا غيخصنا نأجلو الخطبة حتا نشوفو هادشي فين غيوصل

-الخالة هزات سبابتها فوجه كريمة بأمر: والله ما تأجلو شي حاجة، ولد الحرام هو عايش حياتو بالطول و العرض و المصائب اللي تابعينو عمرهم يساليو، مغاديش تبقاو مرهونين بمشاكيلو هو امتا غيتفكو، غاديرو خطبتكم و غتوجدو لزواجكم و هو يعوم بحرو