نهار السبت داز غير فالتحضيرات المسبقة اما نهار الاحد بدايتو كانت بالفياق بكري و الوقوف على الغذا على اعتبار انو الناس جايين من مدينة بعيدة ب 3 السوايع و الزيادة ماجاتش يجيو فالعشية و يعاودو يرجعو بلاما يرتاحو واخا غير شوية.....
واقفة قدام مرايتها لابسة قفيطين سامبل بلا حزام فالباج، مخلية شعرها القصير على راحتو و دايرة ميكاب هادئ مناسب للتعارف لي جايين على قبلو واليديه، كتلبس فمكانتها حتا تحل الباب خلاها تهز راسها فختها لي دخلات عليها كتطلعها و تنزلها بنظرات اعجاب
-ايناس: تبارك الله ما شاء الله، جيتي كتحمقي
-هند بابتسامة: بصح! هي هاديك؟ ماناقصني والو؟
-ايناس: بيرفيكت، الله يكمل بالخير
-هند: يا ربي امين حبيبتي، كلشي واجد؟
-ايناس: كلشي موجود كنتسناو غير مولاي السلطان يوصل
ما سالات كلامها مع صونا تيليفون هند و قطع و فديك اللحظة شدات فختها بايديها بجوج و بدات تفتف
-هند: وصلو
-ايناس: و مالكي تخطف لونك؟ اول مرة؟
-هند: على هادشي فيه اول مرة و تاني مرة؟ هادشي لي انا حاسة بيه اصلا هادي اول مرة نجربو، بحال اول مرة نعيش هاد اللحظة والله
-ايناس عنقاتها: ان شاء الله كلشي غيدوز بيخير
-هند تنهدات: ان شاء الله....
وصل سيف الدين و واليديه و كان فاستقبالهم اسماعيل و علي، دخلو الرجال للصالون اما النسا جلسو فبيت الجلاس كيتبادلو اطراف الحديث حتا تحط الغذا و غير تغذاو تجمعو كلهم فالصالون، الهضرة كانت دايرة غير بين اسماعيل و علي و اب سيف الدين في حين ام سيف الدين عينيها كانو غير على هند لي كانت شادة أروى و حداها كان جالس جاد لي كيلعب مع حفيدتها و كيحاول يضحكها...
هزات هند راسها بالصدفة و طاحو على عگوزتها المستقبلية اللي تبسمات ليها باعجاب، ماكانت باغا والو من الدنيا من غير تشوف ولدها عايش بيخير و فرحان و من خلال كلام سيف الدين على هند، عجباتها هاد الاخيرة قبل ما تشوفها و دابا فاش شافتها و شافت حتا معاملتها مع حفيدتها زاد ارتاح قلبها من جهتها و اطمأنت على ولدها.........
بادلاتها هند التبسيمة و رجعات حدرات راسها لأروى بخجل سواء من النظرات المفضوحة د ام سيف الدين و حتا من الكلام اللي بداه باه و كان موجهو لخوها
-اب سيف الدين: سي اسماعيل، نتا عارف مجيتنا مجية خير، سي سيف الدين هضر معاك و خذيتي الموافقة د الاخت ديالك و على هاد الاساس حنا هنا، طالبين راغبين فلالة هند تكون عروستنا و تكون زوجة مصونة لراجلها و أم حنينة لحفيدتنا و من داكشي اللي عاود لنا عليها سيف ماغنلقاوش بحالها...
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
