فجهة خرى و بالضبط فالدار عند نعمة، خرجات من الكوزينة هازة صينية فيها كيسان د لما مداتها لراجلها اللي كان واقف فالمراح كيتسناها غير بانت ليه قرب منها و نطق بتساؤل
-حكيم: فين خوك و مرتو؟ ل 10 هادي و مازال ما بانو
قبل ما تجاوبو كان تسمع صوت الصونيط فالباب و شيرات بايديها لجهتو
-نعمة: ها هو وصل، سير حل
حط الصينية فالصالون و توجه للباب حلو لقا قدامو عمر مع ريم اللي كانت هازة سناء، سلم على نسيبو و ألقى السلام على ريم قبل ما يرحب بهم، هي استقبلتها نعمة و دخلات هي وياها لبيت الجلاس في حين حكيم رحب بعمر و دخل هو ياه للصالون فين كان جالس صاحبو و اللي كان ضيف عندو فديك الليلة
-حكيم: مرحبا بسي عمر، نعرفك ا سيدي، هذا صاحبي سيف الدين
تبسم ليه سيف الدين و وقف ماد ليه ايديه و صافحو عمر اللي بادلو الابتسامة
-عمر: متشرفين
-سيف الدين: الشرف ليا ا سي عمر
-حكيم: سيف هذا عمر خو المدام
-سيف الدين: متشرفين
-حكيم: تفضلو..
جلسو حدا بعضياتهم واحد كيشوف فلاخر حتا نطق عمر جابد موضوع
-عمر: ماكنتش عارف عندك شي صاحبك هنا فطنجة
-حكيم: لا لا جيت لهنا الله كريم كنعرف غير المدام و غير بالصدفة جا سي سيف لاجونص و عاود تلاقيت بيه، ديجا كنا دي زامي دوزنا تقريبا لكوليج و الليسي حتا فارقاتنا الدنيا انا بقيت فكازا و هو جا لهنا و تقطع بيناتنا التواصل و كل واحد تشغل فحياتو
-عمر: بصح الدنيا كتلهي و شحال د الصحاب كنا كنعرفوهوم و تقطع معاهم التواصل
-السيف الدين: الارزاق ا سي عمر
-عمر: داكشي اللي كاين....
فدوك الاثناء حتا النسا فبيت الجلاس كانو كيتعارفو و هضرة تجبد هضرة بيناتهم و لكن فقط بين ريم و بين زوجة سيف الدين اللي كان باين عليها التعب اما حتا نعمة عقلها كان مرفوع بختها، تسنات تعاود تعيط لها هند و والو و حتا ملي حاولات هي تهضر معاها لقات تيليفونها طافي تاني...
لمحات ريم سهوها و حركات ايديها عشوائيا فالفراغ و هي كتنطق بسميتها خلاتها ترد لها البال
-نعمة: ا حبيبة قلتي شي حاجة
-ريم: فين ساهية
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
