مور العشا و فكازا، دخلات هند لفراشها من بعد ما نعسات ولدها و هزات تيليفونها كتجاوب نعمة لي كانت مصيفطة لها ميساج كتسول فيها
"هند: بيخير بيخير، مديرونجية و لكن صافا
نعمة: مالكي؟"
تنهدات هند و هي حاسة براسها باغا تهضر باغا تفرغ و الشخص لي كانت مولفة كتعاود ليه بلاما تفكر بزاف مابقاش و شكون من غير نعمة لي كانت و مازال هي صاحبة الاذان الصاغية
"هند: داك الشماتة رجع كيطلب السماحة و بغانا نرجعو
نعمة: واش من نيتك؟ واش عارفة اش كتقولي
هند: دابا ا صاحبتي هادشي غنتفلا عليك فيه؟"
ماجاوباتهاش بميساج حيث عيطات ليها، موضوع بحال هذا خاصها تسرح فيه لسانها و خاصها تسبو باش ترتاح الهضرة فالميساجات ماغتبردهاش، اكسيبطات هند لابيل و وقفات فشرجم بيتها حاطة التيليفون على وذنيها
-هند ضحكات بخفة: ماقدرتيش تصبري
-نعمة: واش مريض هاداك ولا مالو، تي كيفاش رجع
-هند: عافاك رجع هاز معاه كارطونة السكر و جايب مو و ختو باش يعاود يخطبني قاليك
-نعمة: لعاااااار، شنو درتي؟
-هند: فنظرك شنو غاندير؟ لبارح فاش جا بوحدو و فاش شفتو قبل فالجردة مرضت و تعصبت و خرجت اعصابي فالبكا و فالانفعال و لكن دابا حاسة براسي بردت، داكشي كامل لي كنت هازة من جهتو تبخر، برد خاطري من جهتو ديال بصح
-نعمة: كيفاش زعما؟
-هند: يعني حتا دوك المشاعر د الغضب و الحقد لي كانو عندي مابقيتش حاسة بهم حيث ببساطة مابقاش عندو تأثير عليا، نكرة بحال ماكنعرفوش
-نعمة: وجهو قاصح والله، دايرها قد راسو و مازال عندو الوجه باش يطلب السماحة و يخطبك گاع
-هند: كلشي متوقع منو، ماعليناش (تبسمات بهدوء) فخبارك ايناس رجعات لها الذاكرة
-نعمة: واش بصح؟؟ امتا و كيفاش؟
-هند: ماعرفتش ماعنديش التفاصيل، قبيلا هضرات معانا و علماتنا
-نعمة: يا ختي والله حتا فرحتيني، الحمد لله على سلامتها
-هند: الله يسلمك
-نعمة: امتا غتجي نتي؟
-هند: نهار الاربعاء ان شاء الله
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
