فعشية اليوم الموالي، فينما كانت شي مرا كتعرف ام ايناس و ساقت الخبار لشنو وقع لها جات لعندها للدار، هي عياو معاها بناتها باش تبقى فبيتها مرتاحة و لكن رفضات، كانت مصرة تجلس معاهم و تدير معاهم الصواب خاصة و انها ماكتحملش تنعس للمرض، ماكتبغيش تبقى غير مخشية فالفراش......
على غرار جميع النسا اللي جاو، لحقات عليهم حتا ام عمر مع بناتها و عروستها و تجمع كلشي فداك الصالون و هما حاضيين غير كريمة و خالتها و النظرات النارية د هند لهم، كون لقات لهم الطريق كون كلاتهم، بالليل كان حابسها خوها و فالصباح مشات معاه جابو مها و لكن طال الزمان ولا قصار غتنفارد بهم و ديك الساعة توريهم شنو هي تطيح مها بسببهم.....
ايناس كانت جالسة بين ريم و كوثر بملامح هادئة و بريق فشكل فعينيها، عقلها غير مع تيليفونها اللي مخلياه كيتشارجا فبيتها و كل مرة كتمشي تطل عليه، غير كتسترجع لابيل اللي دازت بيناتهم بالليل و اهتمامو بها كتفلت لها ابتسامة ماكتقدرش تتحكم فيها، جسدا معاهم و لكن عقلها فبيتها حتا رجعاتها للواقع كوثر اللي نغزاتها
-كوثر: بغيت نحط تيليفوني يتشارجا، بقات فيه 5 فالمية
-ايناس: سيري لبيتي حيدي ديالي و ديري ديالك
-كوثر: لا صافي الا كنتي كتشارجي بيه نشوف د هند
-ايناس: لا را من قبيلة دايراه غيكون تشارجا غير حيديه و حطي ديالك و جيبيه ليا نيت معاك
-كوثر: واخا....
فالوقت اللي خلاتهم كوثر، دارت ايناس عند ريم لقاتها كتشوف فيها و ضحكات بخفة على شكلها
-ايناس: راني مازال عند هضرتي، الا بغيتي ليوم تاخذي معاك تصاوري و علقيهم عندك
-ريم: هههه ماكرهتش، بغيت نقول لك واحد الحاجة
-ايناس: الله يسمعنا خبار الخير
-ريم: غير الخير، انا واقيلا كنتوحم عليك
-ايناس: حاملة؟؟
ريم حركات راسها بالايجاب في حين ايناس غطات فمها بايديها و هي كتضحك بفرحة
-ايناس: مبرووووك ا صاحبتي مبرووووك، والله حتا فرحتيني
-ريم: الله يبارك فيك، الله يسهل عليك حتا نتي بشي ولد الناس و نفرحو معاك
-ايناس تبسمات لها و حدرات راسها: امين
-ريم: الحمد لله على سلامة ماماك، دازت على خير
-ايناس: هاد المرة كانت قاصحة، مولفين فيها كيطيح لها سكر و لكن عمرها سخفات لنا او وصلنا بها حتا لوبيطال
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
