فزوال يوم السبت، صوت الدقايقية مسموع فارجاء الدرب و الدفوع الهماوي اللي جايب اسماعيل كان محط انظار گاع الجارات اللي طلو من الشراجم و كيتساءلو لمن جاي هاد الخير، لبنات كانو واخذين راحتهم و كيغنيو و كيشطحو على اعتبار انو مكاينش شي واحد غريب اللي يحشمو منو او يقيد حركاتهم، و اسماعيل كان واقف وسط عائلتو ناشط مع عمر و معاذ اللي وقفو معاه مونسينو.......
دخلو النسا للشقة و بالضبط للصالون اللي كانت بارزة فيه كريمة و هي لابسة قفطان فالابيض بطرحة فنفس اللون، تحط الدفوع قدامها و دارو الدقايقية حقهم فوسط الدار عاد خرجو بحالهم، تكلف العريس بالطرحة حيدها على وجه مرتو و تفننو عليهم البنات بالتصاور حتا حمقوه عاد طلقوه مشا بحالو و زادو خذاو راحتهم بوجود غير النسا بيناتهم فقط...
كوثر حيدات الزيف اللي كانت دايرة على راسها و طلقات شعرها اما ايناس من الاول كانت جامعاه حيث جاية ناوية على الحيحة خاصة ملي هضرات مع كريمة باركات لها على العقد و علماتها بلي دايرين العاونيات...........
بدات الحفلة و بدا الفرح بالعاونيات اللي حماو الطرح، اللي مكتعرفش علموها و اللي حشمانة طيروها منها و حتا من العروسة ماقالوهاش نوضوها دير حقها و لكن اللي قالت لهم مكتعرفو والو هي ايناس اللي فالاول كانت حشمانة و مازعماتش قدام عائلة كريمة و لكن غير حمى الطرح تحزمات و شداتها ضد مع وحدة من دوك العاونيات تقول وحدة منهم، كتشطح من نيتها فرحانة براسها و بخوها و غافلة على اللي جبدات تيليفونها و بدات تصور فيها.......
جلسات حدا مها كتنهج و كتضحك و عماتها و خالاتها ففمهم غير "تبارك الله عليك"، خذات كلينيكس من صاكها و بدات تمسح فالعرق اللي كان نازل معاها حتا تحنات عندها ام معاذ خلاتها تنتبه لها
-ام معاذ: قراي على راسك ا بنتي را گاع العينين محطوطين عليك
-ايناس: ههه اش عندو مايوقع ليا گاع
-ام ايناس: العين حارة ا بنتي و كاينة غير الله يحفظ
-ام معاذ: ماماك عندها الحق، صافي باراكة من الشطيح رتاحي
-ايناس: اصلا عييت و ضراتني رجلي اللي مهم هو بردت غدايدي
هزات راسها فالبنات لقاتهم كيشيرو لها باش تجي حداهم، دارو لها بلاصة بين كوثر و ريم و جلسات و هي مازالة كتنهج
-سليمة: لعااااار فين تعلمتي و كيفاش و امتا هههه را بزااف ديك البنت مسكينة بقات فاللخر غير كتشوف
-ايناس: ههههه والله ما عرفت بعض المرات كنشعل الشعبي غير فالدار و كنبقى نركز حتا كنعيا
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
