فالمساء و فجهة خرى، كانت ايناس جالسة مع مها و ختها، كل وحدة متكية على كتف مها من كل جهة و قدامهم جالسة كريمة اللي كانت كتاكل فالشهدية، وحمها جاها غير عليها
-ايناس: بصحتك، شنو عندك؟
-كريمة بابتسامة: بنيتة ان شاء الله
-ايناس: الله يفكك على خير
-كريمة: امين....
هزات ايناس راسها من على كتف مها و دورات عينيها بيناتهم بثلاثة
-ايناس: عاودو ليا شنو نسيت، كيفاش تزوج اسماعيل بكريمة و كيفاش تزوجت انا و كيفاش تفارقتي ا هند مع زهير و شنو وقع بيني و بين كوثر؟ علاش ماجاتش لبارح مع عمتي و خوتها؟
-ام ايناس تبدلات سيفتها: ديك الممسوخة ماتعاوديش تذكري سميتها، كون غير نسيتيها و بقيتي مفكرة راجلك حسن لك
-ايناس ضحكات: أو لهاد الدرجة گاع؟ عارفاك ماعندكش معاهم و لكن ماعمري سمعتك كتعيري فيها هاكا
-ام ايناس: اودي ا بنتي الا جينا نشوفو را نتي اللي خاصك العصا و نتي اللي حليتي لها الباب حتا دارت فيك ما دارت، ما سمعتي ليا لا انا لا لحتا شي حد، حتا من راجلك هضر معاك و ماتسوقتيش ليه
-ايناس تعقدو حجبانها: ماما قولو ليا نيشان شنو كاين بلا هاد الهضرة بالقطارة
-هند: دابا خلينا مستمتعين بهاد الجلسة، شحال هادي ما حسينا براسنا مرتاحين لهاد الدرجة، تال مور العشا و قبل ما نعسو غنقول لك كلشي
-ايناس: وعد؟
-هند؛ وعد ا لالة....
تسناو اسماعيل حتا جا و تعشاو فالجو العائلي الحميمي اللي فكرهم فأيام زمان غير دابا زايدة عليهم كريمة و زايد عليهم أيوب و جاد اللي كانو محليين الجلسة بشغبهم.....
من بعد العشا و غير نعسات هند جاد، تخشات فبلاصتها و فانتظار تجي عندها ختها، هزات تيليفونها لقات سيف الدين مصيفط لها ميساج
"سيف الدين: سعدات اللي غابر علينا النهار كامل، سعدات اللي توحشناه و هو هاز راسو للسما مامسوقش لنا، اش هاد الغبرة ا هنودتي؟"
من غير داك الميساج لقات لي زابيل ديالو فاوقات متفرقة فالنهار من بعد الميساج ديالها اللي صيفطاتو ليه فالصباح مجاوباه على الميساج الصباحي ديالو، كانت مترددة واش تجاوبو او تسكت، واش تولف ليه شوية بشوية مايبقاوش يهضرو بزاف ولا تبع رغبتها و تبع شوقها و تصيفط ليه، قبل ما تقرر كان هو طلع ليه بلي قرات الميساج و عيط ليها ديك الساعة، تقادات فجلستها و جاوباتو كتحنحن
-هند: اهلين
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
