*فلاش باك*
من بعد ما دازت الصدقة على خير و تفرق المجمع، لبسات الجلابة باش مشات لعند العدول و لوات الزيف على عنقها و هزات صاكها قبل ما تخرج من بيتها، لقات مها واقفة مع عگوزتها و خواتات العريس كيتسناو فيها غير بانت ليهم قربو منها و نزلو مجموعين لقدام الباب فين كانو خوتها و باها مع العريس و باه و خوتو......
سلمات ببرود على مها اللي كانت كتبكي، من الاساس كانت باغا غير تفك منهم باش ترجع حريتها و ماكانوش كيهموها لا دموع مها لا عدم مبالاة خوتها و باها اللي سلمو عليها بلا نفس، طلعات حدا حميد اللي كان كيبان نورمال و مهدن و تبسمات لمو اللي طلعات القدام فالوقت اللي ركب حتا باه و قبل ما يتحركو طلات براسها للمرة الاخيرة على واليديها و خوتها و هي كتحلف بلي غترجع و غترجع باش دير فيهم ما اكثر بما انهم سمحو فيها و لاحوها ديك اللوحة.........
مسافة الطريق دوزاتها و هي ناعسة، كان عاجبها الحال غير حيث اهل العريس رفضو يباتو و فضلو يشدو الطريق فديك الليلة نيت كيفما دارو فالخطبة داكشي علاش استحلات الطريق و غمضات عينيها و هي مرتاحة و ما فاقت حتا سمعات صوت الخبيط و الطوموبيل واقفة.....
قلبات وجهها كتقلب على مصدر داك الخبيط حتا لقاتو جاي من برا و كان حميد اللي كيضرب فالطوموبيل بلكمة ايديه و عينيه عليها خارجين خلعها و حداه واليديه كيحاولو معاه يحبس و يتهدن و ما هي الا لحظات حتا وقفو حتا طوموبيلات خوتو و نزلو كلهم كيتساءلو شنو وقع و بما انها مرتو و المفروض اقرب وحدة ليه نزلات حتا هي و علامات التساؤل ظاهرين على ملامحها
-كوثر: شنو واقع؟
-ام حميد: والو غير طلعي نتي
نبرة صوتها مع الطريقة باش ميقات فيها عطاتها الخبار بلي شي حاجة ماشي هي هاديك، رجعات شافت فحميد و نطقات موجهة كلامها ليه بلاما تسوق لمو
-كوثر: حميد مالك؟
-حميد عينيه عليها ماتزعزعاتش: بغيتك بغيتك دابا
-اب حميد باحراج: لعن الشيطان ا حميد نوصلو و دير ما بغيتي
-حميد كيحرك فراسو بالايجاب و عينيه مازال على مرتو: بغيتها بغيتها بغيتها دابا
-اخ حميد: واش شارب دواه هذا؟ مسينا على الله
-ام حميد: شربو يا وليدي شربو و لكن بالتلفة و الزربة ماجبتش معايا حساب الليل ما ظنيتش غنتعطلو لهاد الساعة
-اخ حميد: خليونا بلاما نضيعو الوقت كلما تعطلنا غيولي عدواني كثر، خليونا نتعاونو و ندخلوه
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
