و لي خلوة في رغد عيناك

بارت ٥

هزات عينيها من جديد فيها حتا تلاقاو مع خضرتيها المميزين .. حشمات من بنتها متلفة نظرها فاتحة فمها مخرجة صوت متقطع و تعاود الكلام لعدم تنظيمه فعقلها قبل متخرجوا ..
- حنين : واخا .. حم واخا نبقا ماماك ؟ واخا نبقى ماماك واخا عرفتي انا ماشي هي !

بقات كتشوفيها سؤالها جاها غريب "ياك هي مها" الجواب كان على طرف اللسان ميحتاجش تفكير ..
- رغد : متحتاجيش !

هزو راسهم فيها دغيا .. حنين علاين اسكت ليها القلب .. حتا لقطو وذنيها كلمات أخرين جايين فالطريق من رغد للي مكملة حديثها مركزة معاهم .. قابط عيسى فيديها هي .. حنين .. للي عينيها شلال صامت ..
- رغد : حيت عندي حتا وحدة ما كانت قبل منك و حتا وحدة مغتجي بعدك واخا تنطابق السما مع الأرض ... نتي ماما و غتبقاي ماما فعيني ..
مامي حنين روح متقي ..

- نقز عيسى گالك تا هو : نسيتي الوزاني ..

- رغد جاتها الضحكة تعرضات ليها حاطة يديها على فمها كيف ديما حتا حيداتها جامعة كتيفاتها : اه بصح الوزاني الوزاني ..

ناضت من حداه غادا ليها هي للي گالسة قدامها تلاحت عليها كتعنق و تبوس و تبكي و تقول شي مبكيتو و هي تضحك ليها كتهرها بالنفس كتهضر ليها فعنقها مغنغن و تطلب السماحة ملقات راسها غا مزيراها كطبطب عليها .. كتطبطب على خاطر ماماها ..

رغد فشات قلبها النهار للي تجرحات و كانو الراس فالراس بوحدهم .. فشات قلبها و سالات متحتاجش .. من يوم يومها شابعة دلال و حب و لا نبشة فرق بينها و بين خوتها و زيد حنين ماشي ملزومة فتربيتها و لكن دارت جهدها معاها .. امكن تربيتهم ليها خلاو عقلها كبييير متَعَقِّلَة و واعية .. فالأخير كيف قال عيسى فهو مجرد إسم على ورق لا غير ..

"و لكن .. واخة هكا صعيبة .. معرفتش كيفاش نشرح و لكن تسمعها من لسانهم ليها أثر آخر و مذاق آخر
لكن صعيبة ياك ؟؟" ..
معلينا نكملوا ....

- رغد : مامي (خرجاتها من عليها كتمسح ليها عينيها) حتا حاجة مغتبدل .. و عمرها غتبدل ..

- حنين بشهقة راحة كلشي مخلط : ياك ؟ (قبطات ليها فيديها كترجف) غتبقاي بنتي ..

- رغد و بضحيكة خفيفة : و غتبقاي ديما ماما (سكتات جزء من الثانية تا كملات) و الله ..
................

رجعات ليها عينيها مزال كتاكل و تدوقها ريم و ترجع تعطيها حتا هي .. حتا تبثات و طيف الذكرى مشا مع حضور الواقع للي خلاو بالها ارجع لراسها .. صحيح قالت ليها تا حاجة متبدل و لكن حسات بشي حاجة مهياش .. معلش المهم حداها و على عينيها .. ليام اتصرفو ..

سمعات الصوني دارت شالها على راسها جات تنوض هو احبسها ..
- عيسى طبطب على فخضها : خليك غيكونو غا هوما ..

- حنين : واخا ..

مشا فتح الباب حتا تسمعات الهضرة دخلات حنان هي الاولى بأونصومبل كلاس هازة صاكها كتشير من بعيد عاد دخل راشد مع عيسى حتا هو قاليك الناس ولاو بوسط صحيح نعام اسي ..
- حنين وقفات معرضة ليهم : على السلامة ..