و لي خلوة في رغد عيناك

بارت ٥٤

لابسة كتبدل عليه الكوشة كتغوت من الريحة و تعيب عليه حتى ترجع تاني طالقة حلاوتها .. كيلبس عليه فالبيت كيتبسم شويا .. حالتها روناتو معارفها مقصحة و لا مزيانة و لا متقبلة حالها .. و لا شنو ..
مي حاجة استنتجها بللي هازة خاطرها من دارهم .. و بالنسبة للمرأة للي جات على اساس مها للي ولداتها .. لقطة فكلامها خلاه اشك ..
مشا لعندها كتسد لمنعم الطرطقات جيهت الكثاف محنية كتبوس فيه كلاتو .. كيحرك رجليه بحماس و هي معاه .. وقف عليها هزات عينيها فيه .. بإعجاب كالعادة داير نظاظر على عينيه و كاسكيط مع قاميجة كحلة و سروال ..
- رغد : جاتك اللبسة واعرة ..

- خدا يدو فحال لا رد شعرو اللور هاز راسو للفوق : عارف .. و هل يخفى القمر ..

ضحكات رادا عينيها لولدها واخدة شابو دارتو على راس منعم من الشمس خلاتو معاه و هزات كوشتو مشات لاحتها دازت للحمام قادات امورها و خرجات لعندهم .. وقفو كاملين هازو و هي هازة صاكو كتلبس السبيبيط و هو لايح رجليه للسبرديلة حتى خداتو من عندو محني كيعقدهم ..
خداو طريقهم للباب فحين هو كمل للگاراج مخرجها .. قادوه فكرسيه فاتح ليها الباب .. كيلعب فحجبانو ليها طلعات و رجع هو لبلاصتو ..
القاعيدة ديال اليد متحيداتش .. راه مشابكة مع ديالو كيشاورها على البلايص للي كيقادو فيها الشواية كتعرفها حتى صدماتو ..
- رغد : كناكلو الخوت فقنيطرة ابهاء .. فقصتيناي ..

- ضحك : شنو نمشيو ليها ؟

- رغد : قنيطرة !

- بهاء : وي مالنا اش خاصرين ..

- رغد : الا راك خدام غدا .. غتعيااا ..

شاف فيها بنص عين من تحت نظاظرو وصلوها .. هزات كتافها ..
- رغد : ااا للي بغيتي (كحزات حداه) و لكن غنشوف جدو و ميما .. (رمشات كتشوف فوجهو كيحاول اتحكم فبسمتو كي كدير) اش قلتي ؟ امم ! .. شحال مشفتهم .. واخا غا السيمانة للي فاتت جاو اشوفو منعم الصغير .. امم ؟ (عيات بدات كتهضر بين سنانها) بهاء راك فقصتينااااي ..

ضحك فاش عصبها .. حنى عينو ليها كتشوف فشفايفو لي طوالو ببسمته .. ردات عينيها ليه و حنى ديالو خاطف على الطريق و صافي ..
- بهاء : ندوزو ناكلو حيت فيا الجوع ندخلو من مهدية نيشان ياك ..

- رغد متبعة معاه : اهاه ..

- بهاء : اوى باش الملوية ديالي بالعسل متسيحش و تبرزطنا ياك

- رغد : اهاه

- بهاء : و ناخدو ليهم حقهم و نمشيو نشوفوهم .. و نرحعو من لوتوروت .. ياك

- رغد : اهاه

- بهاء : و نتفرج مع السالبة روحي فالفيلم و ناكلو الحلا يا حلا ..

رغد بالفرحة رجعات اللور مخدمة الموسيقى كتمايل بحماس كترحك شعرها و اثبتها ... حتى كضور تشوف فمنعم و حالو و ترجع لعوايدها ..
واخا الطريق مكرفصة شويا كانو دخلو لمهدية بنجاح ساد السراجم گالسة رغد اللور كترضع عندها منعم كيتلصقو ليه عينيه لايحة شال مغطية بيه .. كيمشى بالشويا مع الناس للي كيقلبو بلاصة فين ابلاصيو .. كون غا هو كون ضوبل مي سي بهاء الدين دخلاتو المسؤولية و الأبوة دايرة فيه ما بغات ..
معفى عليه الله تا وصل للرومبوان مكمل نيشان 2 ديال الطرقان مسهلة عليه المأمورية شويا عافط .. حتى وصل للمرسى ، الحوت عاطية ريحتو و البلاصة فين اوقف موجودة .. سطاسيونا بقا لداخل عند حسو الخاطر تا للجذر كيساين رغد تسالي كيسولها ..
" واش عند هادا ؟ كتعرفي اخر ؟ زوين عندهم هادشي ؟"